ميدو: يجب حل أزمة محمد صلاح والتؤام بذكاء.. متسيبوش الموضوع لأصحاب اللقطة
علق أحمد حسام ميدو نجم الزمالك السابق، على أداء المنتخب الوطني تحت قيادة حسام حسن، في ظهوره الأول أمام نيوزيلندا في افتتاح كأس عاصمة مصر.
ميدو يعلق على أداء منتخب مصر
وكتب ميدو عبر حسابه الرسمي على موقع إكس: عجبني المنتخب إمبارح، اللاعيبة بتقاتل، ومنتخبنا بعد الهدف ساب الاستحواذ ولعب على المرتدات بشكل كويس.
وأضاف: بعض من أفكار حسام حسن واضحة، بمحاولة تجميع اللعب في ناحية ونقل الكرة بسرعة للناحية الثانية، مهم إن الرسالة واصلة اللي مش هيقاتل كل دقيقة وكل ثانية في الملعب مش هيكون ليه مكان في التشكيل الأساسي.
وأكمل: الخطوة الجاية لازم أزمة محمد صلاح مع الجهاز تتحل، وتتحل بذكاء بتدخل مسؤولين كبار متسيبوش الموضوع ده لأصحاب اللقطة.
واختتم ميدو: ومهم جدا عودة أحمد فتوح للمنتخب، محمد حمدي لاعب كويس لكنه مش الباك لفت اللي هيشيلك في الماتشات الثقيلة، البداية لازم تيجي من فتوح وإن شاء الله يكون مركز ومتألق الفترة اللي جايه مع الزمالك، وترجع المنتخب لاعب اساسي لإن ده مكانك الطبيعي.
ميدو يوجه رسالة إلى حسام حسن
ووجه ميدو رسالة إلى حسام حسن، حيث كتب عبر حسابه على إكس: وقفة المدرب النجم على الخط حاجة ثانية، وقفة حسام حسن على الخط إمبارح حسستني بهيبة منتخب مصر لأول مرة بعد كابتن جوهري الله يرحمه، وكابتن حسن شحاتة ربنا يديله الصحة.
وأضاف: نصيحتي لكابتن حسام، لا تتحدث في الإعلام إلا في المؤتمرات الصحفية الرسمية للمباريات، كل كلمة هتقولها في الإعلام هتضرك، المتربصين كتير واللي عايزينك تفشل كتير حتى ولو على حساب المنتخب.
واختتم ميدو رسالته: عايز تنجح متتكلمش، ولا تخلي كابتن إبراهيم يتكلم إلا للضرورة القصوى.
