البلوجر جون ملاك صاحب فيديو جدته: حبت تفرحني بـ 10 جنيه.. وهي متعودة على كدا مع 15 حفيد
شارك رواد السوشيال ميديا التعليقات على فيديو البلوجر جون ملاك الذي عرضه عبر حسابه على التيك توك، يوثق لحظة حنان وحب جدته العجوز وهي تعطيه مبلغ مالي ليكون مصروفه خلال أيام دراسته، وفي إطار ذلك ظهرت تناقضات في التعليقات بين المشاركة الإيجابية والتعقيب السلبي.
لحظة حنان تثير إعجاب الملايين
تيتا محوشالي مصروف الكلية.. هكذا وصف جون عبر الفيديو الذي حصل على ملايين المشاهدات، بعد أن شارك به متابعينه على حسابه الشخصي بـ تيك توك، ما فعلته معه جدته العجوز التي أعطته مبلغ مالي صغير سرًا باعتباره مصروف يومه الدراسي، مما أثار تعاطف ولفت أنظار المُتابعين ومشاركة قصصهم مع أجدادهم عبر التعليقات، واستياء متابعون آخرين بـ: ما تروح تشتغل أحسن ما تاخد منها.
جون: مش باخد من مصروف بيتها هي حبت تفرحني
وقال جون لـ القاهرة 24: أنا بدرس هندسة تصميم وديكور، والحمدلله أبويا مش مخليني محتاج حاجة من حد، بس هي جدتي متعودة أنها تفرح الكل حتى لو بحاجة صغيرة، أنا مش باخد من مصروف بيتها، هي بس حبت تفرحني بأقل حاجة زي إنها بتشيلي 10 جنيه من مصروفها وتديهوملي، يمكن مبلغ صغير بس بالدنيا ومافيها حقيقي، وأضاف: احنا أكثر من 15 حفيد في العيلة، هي متعودة تعمل كدة مع كل واحد بس بتقدم اللي كل واحد محتاجه.
وعبر جون عن فرحته بتلك اللحظة البسيطة التي أظهرت فيها جدته العجوز حبها وحنانها له، قائلًا: رد فعلي كان حقيقي من جوه قلبي، كنت بضحك مع دموعي من الفرحة، لأني مكنتش متخيل خالص إن دا ممكن يحصل فجأة كدة، تيتا حنينة ولمست قلبي.
تعليق البلوجر جون ملاك على مُشاركة المُتابعين
وعقب: أنا كنت عارف إنها هتديني حاجة، بس دائمًا كانت بتديني توفي فعلًا.. شيبسي أو كنافة مثلًا، لكن مكنتش اعرف انها محوشالي فلوس خالص، موضحًا رد فعله على مُشاركة المُتابعين قصصهم مع أجدادهم على صفحته الشخصية على تيك توك، قائلًا: في حاجات كانت حلوة فرحت بيها، زي الناس اللي كانت بتدعيلها وبتديني نصائح اني أقرب منها أكتر وأقضي معها وقت أطول، وده كان بيخليني أخاف لأني مش هستحمل غيابها يوم.
البيوت أسرار
وتابع جون: وفي أشخاص تانية افتكروا أجدادهم الله يرحمهم بالسيء وبيقولوا أنهم كانوا بيفرقوا بينهم، والتعليقات دي وجعت قلبي لأني حسيت بيهم، بس البيوت أسرار ومش صح أن الناس تحكي ده في التعليقات.
