والدة حبيبة الشماع فتاة الشروق بالتحقيقات: بنتي كلمتني وقالتلي سواق أوبر اللي راكبة معاه شكله مريب| انفراد
كشفت التحقيقات في قضية حبيبة الشماع فتاة الشروق، والذي حوى شهادة والدة حبيبة، التي كشفت آخر مكالمة أجرتها معها المجني عليها، وتفاصيل المشادة الكلامية بينها وبين سائق أوبر، والحالة الصحية لابنتها بعد تعرضها للحادث.
تحقيقات قضية حبيبة الشماع
واستدعت جهات التحقيق والدة حبيبة الشماع، لسماع أقوالها في الواقعة، وجاءت أقوالها كالآتي:
اللي حصل إن بنتي كانت رايحة التجمع وأنا كنت واخدة العربية فهي طلبت أوبر وكلمتني الساعة 6:50 مساء الموافق 21 فبراير 2024، وقالتلى إن هي ركبت العربية وصوت المزيكا حواليها اللى كان مشغله السواق كان عالي، فهي قالتله ممكن بعد إذنك توطي المزيكا، أنا مسمعتش رده كان ايه بالظبط بس هي كانت مستغربة الرد قوى وقالتلي ده غریب قوي وشكله مريب فأنا قولتلها طيب خلاص إنزلي واطلبي أوبر تاني، بس هي قالتلي لا خلاص إحنا طالعين الشارع أهو متقلقيش أنا هكلمك لما أوصل وقفلنا المكالمة على كده.
وأردفت والدة حبيبة الشماع، بعد كده على الساعة 7:55 مساءً لقيت واحدة صاحبتها اسمها دينا بتكلمني وبتقولي إنها عملت حادثة بأوبر وإن هي معاها في العربية اللى وراها وإنهم رايحين على مستشفى الشروق، فأنا رحتلهم على هناك ولقيت ضابط شرطة من القسم بيسألني في المحضر، وبعد كده نقلناها على المركز الطبي العالمي وأنا قاعده معاها من إمبارح والنهاردة لقيت النيابة بتكلمني وبيقولولي إن هما عاوزني أتسأل في المحضر فجيت على هنا.
وأضافت والدة حبيبة الشماع في اعترافاتها: اللي أنا عرفته إن هي نطت حوالي الساعة 07:00 بالظبط على طريق السويس اتجاه القاهرة قبل الكارتة بتاعت التجمع الأول، وحبيبة الشماع هي بنتي، وكانت رايحة التجمع، بس أنا معرفش بالظبط بس هي كانت رايحة مكان ايه في التجمع، بس هي كانت رايحة عشان تشتغل، وطلبت أوبر، وأنا فتحت الأبليكيشن بتاع أوبر من الأكونت بتاعها وطلعت منه بيانات الرحلة والعربية والسواق.
وقدمت والدة حبيبة الشماع صورا مقتطفة من تطبيق أوبر تفيد رقم السيارة استقلال المصابة حبيبة الشماع، وأن مدة الرحلة هي من الساعة 06:50 م إلى 07:01 مساء وأن مكان انتهاء الرحلة هو على طريق السويس بجوار الشروق وكذا صورة مقتطفة من هاتف المحمول لصورة سائق الأوبر بالرحلة التي كانت تستقلها وكذا صورة من ذات التطبيق تفيد بأن اسم السائق على التطبيق هو محمود.
واختتمت والدة حبيبة الشماع: بعد كده أنا لقيت واحدة صاحبتها اسمها دينا بتكلمني وبتقولي إنها عملت حادثة بأوبر، وقالتلى إن هي راكبة في العربية وراها عشان هي عملت حادثة على طريق السويس وهى راكبة أوبر وإن هما رايحين على مستشفى الشروق، وأنا رحت بسرعة على مستشفى الشروق، وهي كانت في غيبوبة ودماغها كانت مفتوحة كانوا بيخيطوها والأرض كانت كلها دم ولبسها كان مقطع وكان عليه دم، وكانت في غيبوبة وارتشاح في المخ ونزيف في المخ وضغطها علي وسخنت وجروح وكدمات في جسمها كله وفاقدة الوعي والتنفس ومكنتش بتتكلم.
