مي عمر: اتعلقت بشخصية نعمة الأفوكاتو.. ومش عيب الست تضحي علشان خاطر جوزها
تحدثت الفنانة مي عمر، عن كواليس مسلسلها نعمة الأفوكاتو الذي انتهى عرضه اليوم ضمن المسلسلات المشاركة في الماراثون الرمضاني، ذات الأعمال المكونة من 15 حلقة، وتعاونت خلاله مع زوجها المخرج محمد سامي.
وقالت مي عمر عن شخصية نعمة التي جسدتها في المسلسل في تصريحات تليفزيونية: نعمة من أكتر الشخصيات اللي حبتها، لأنها مختلفة في كل حاجة، في طريقة كلامها وهزارها وجرأتها وردودها على الناس وتفكيرها، وأنا حبتها واتعلقت بيها جدًا، وبحب شكلها جدًا ولبسها وهي شبه ناس كتير أعرفهم.
وعن سؤال المذيعة لها: في واحدة تضحي علشان راجل كل التضحية دي قالت: فيه والله فيه كتير أوي بيعملوا كده، وما أقدرش أقول الست غلط، لأنه مش غلط على الست، لكن الغلط على رد فعل الراجل أنه استغل الموضوع غلط، وفيه ناس كويسة وفيه رجالة كويسة ولو الراجل كويس يستاهل تعمل كده عشانه ليه لأ، مش غلط هو استخدم الموضوع بطريقة غلط، وفيه نماذج كتير موجودة مش بس في مصر، والست بتسافر وتشتغل وتبعت لجوزها فلوس وهو ياخد الفلوس ويتجوز عليها.
وأضافت مي عمر: لما شاركت في الأسطورة، كانت فاتحة خير عليا وأكتر دور الناس عرفتني منه، وفضلت فترة كبيرة الناس بتقول لي يا شهد، وعملت أعمال كتير ناجحة بعده، لكن نجاح الأسطورة نجاح مبالغ فيه، وكنت بضايق أن ليه الناس بتندهني بشهد مع أني عملت أعمال بعده ناجحة، وكنت مرة بقول ليه يا محمد الناس بتقولي يا شهد، وقتها محمد سامي قال لي طبيعي، قلت له نفسي الناس تنهده لي باسم شخصية تانية.
وأكملت: لما عملت لؤلؤ كنت مؤمنة به، وبحبه جدًا، وبحب كل حاجة فيه، وزعلت لما خلصنا تصوير، لأني كنت بحب لؤلؤ جدًا من وهي صغيرة لحد ما كبرت، وفجأة تحولت من شهد لـ لؤلؤ فهو ده النجاح اللي أنا عاوزه أحسه، لأن لما الفنان يقدم عمل وينجح نجاح كبير، لو قدم نجاحات تانية بعده بس أقل مش هيكون راضي ومبسوط.
مي عمر تكشف سبب ظهورها دون مكياج في نعمة الأفوكاتو
وعن ظهورها بدون مكياج في مسلسل نعمة الأفوكاتو قالت: أنا مش زي ما أنتم متخيلين، أنا بحب أعيش الشخصية، ومثلًا في مسلسل لؤلؤ الشخصية ما ينفعش تكون نجمة من النجوم وما ينفعش يكون لبسها مش مناسب للشخصية، وأنا بعمل الشخصية زي ما هي حتى لو اطلب مني اتخن أو أرفع أو أشيل شعري لأني بستمتع بشغلتي وبحبها.
