هشام ماجد: شُفت ناس بتتجنن من الشهرة والفلوس.. وانفصلت عن أحمد فهمي وشيكو بسبب الخناقات
كشف الفنان هشام ماجد تفاصيل بدايته الفنية وانفصاله فنيًا عن أحمد فهمي وشيكو، موضحًا أنه نشب العديد من الخلافات بينهم.
وقال هشام ماجد، في تصريحات تلفزيونية: لما عملنا ورقة شفرة كان كل واحد بيشتغل جنبه شغلانة مختلفة، وكنا سايبنها على الله، وأول واحد إدالنا فرصة هو محمد حفظي، وأول حاجة عملناها كانت أفيش وتقفيش، كنا بناخد على الحلقة على الكتابة 800 جنيه وتمثيل 300 جنيه، وشيكو كان رافض الشغل معانا وكان عايز يكمل مهندس، وهو كان عنصر مهم جدًا، وهو اقوى واحد فينا في التمثيل.
وعن انفصاله فنيًا عن شيكو وأحمد فهمي، أضاف هشام ماجد: إحنا إصحاب من الجامعة، ولما جينا نعمل الرجل العناب فيلم، بعد ما عملناه مسلسل، اتفقنا أن أحمد فهمي هو اللي هيكتب هو وشريف نجيب بس، عشان ميحصلش مشاكل، ولما فهمي كتب الفيلم، أنا وشيكو كان عندنا اعتراضات على الفيلم، وفهمي شاف أن ده عدم تقدير له، فـ قفشنا في الجزء ده، وقررنا أننا منعملش الفيلم سوا، وفهمي قرر أنه ينفصل ويشتغل لوحده.
وأكمل ماجد تصريحاته قائلا: كان بقالنا كتير بيحصل خناقات بس ومبتبانش للناس، وطول الوقت كان فيه اختلافات، ومفيش فرقة مبيحصلش فيها اختلافات، ومحدش بيكمل وقليل اللي بيكمل، وأما حصل نفس الكلام، وبرضو بنتخانق أنا وشيكو بس مبتوصلش أننا ننفصل، وممكن نشتغل مع بعض إحنا التلاتة، بس منرجعش نبقى فرقة تاني، لأن خلاص كل واحد عمل شغل لوحده ونجح.
هشام ماجد: مبحترمش المغرور
كما علق هشام ماجد على إصابة البعض بالغرور بعد حدوث نقلة نجاح في حياته، قائلًا: أنا مش مغرور الحمد لله، ومتأكد جدًا إني مش مغرور، بس فيه ناس بتتغر وتتغير بعد الشهرة، والشهرة بتجنن، أنك تبقى محدش يعرفك وتعمل عمل يدغدغ الدنيا وتلاقي كل الناس بتتكلم عليك، أو يبقى مش معاك فلوس وتلاقي فجأة الناس بتعرض عليك فلوس كتير.. دي نقلة في الحياة تجننك.
واختتم: شُفت ناس بـ تتجنن من الشهرة عشان مش سوية، والخضة دي بتخليه يتجنن، ومبحترمهمش، عشان بين يوم وليلة ربنا إداله نعمة زيادة، فنسى الناس وأصحابه، ومحدش عمل معايا كده لأن محدش يقدر يتكبر عليا، ومش مشاهير بس فيه ناس عادية بتتغير، وإن شاء الله مش هتغير.
