آية سماحة عن مشاركتها في خالد نور وولده نور خالد: ضربت عصفورين بحجر.. ومكناش رايحين نهزر وخلاص
تحدثت الفنانة آية سماحة عن مشاركتها في مسلسل خالد نور وولد نور خالد، بطولة كريم محمود عبد العزيز، وشيكو، والذي بدأ عرضه في النصف الثاني من السباق الرمضاني 2024.
وقالت آية سماحة، في لقائها مع الإعلامية سارة الدندراوي، في برنامج تفاعلكم: أنا نفسي كنت بتلغبط في اسم مسلسل خالد نور وولده نور خالد، لغاية وقت قريب أوي، وهي فكرة جديدة، وحسيت أن فيها فانتازيا وكوميديا.
وأضافت: كان نفسي اشتغل مع كريم محمود عبد العزيز وشيكو، فالموضوع كان عصفورين بحجر واحد، والدور وموضوع المسلسل بالنسبة ليا كان غريب ومثير، وكنت متحمسة ليه، ولكن مش سهل أننا نفهمه ببساطة، والأحداث فيها مفاجآت كتير.
وأكملت سماحة: أنا كنت قلقانة زي أول مرة، ولكن لما بتبقي مع ناس عندها رؤية تحترم وتتعلمي منها وتفتح حاجة جديدة في المنظور بتاعك في العمل، ده شيء أنا بتعلم منه.
كما أعربت آية سماحة عن سعادتها بالتعاون مع الفنان كريم محمود عبد العزيز وشيكو، قائلة: كريم محمود عبد العزيز وشيكو مجتهدين جدًا، وأغلب مشاهدي كانت معاه وكان بيديني نصائح بتفيدني جدًا، وبالنسبة للشغل مع أستاذ محمد أمين فدي تاني مرة اشتغل معاه، واتبسطت جدًا بالتجربة ومكناش رايحين نهزر وخلاص، وكان في مشاهد دراما.
وعن عرض مسلسها في النصف الثاني من شهر رمضان، علقت آية سماحة: دي أول مرة يتعرض ليا حاجة في النص التاني من رمضان، وأنا محظوظة الصراحة.
آية سماحة: مسلسل كامل العدد رسالته السلام
كما تحدثت آية سماحة عن مشاركتها في مسلسل كامل العدد، قائلة: كامل العدد رسالته أن نعيش في سلام، مهما كانت العيلة كبيرة وفي مشاكل وبنختلف في الحياة ولكن في الآخر نعيش في سلام، وحاجة مبشرة أن الناس لسه بتتأثر بالسلام النفسي، وأنا مستغربة أن الناس متأثرة بالدرجة دي ولكن فرحني، ومكنتش متخيلة أن الناس متعلقة بمشروع بالشكل ده، وأنا حاسة أن فريق العمل عيلتي.
