صفاء جلال: بكلم ربنا طول الوقت.. ودخولي التمثيل كان اختياره ليا
تحدثت الفنانة صفاء جلال، عن تفاصيل دخولها الوسط الفني مؤكدة أنه كان اختيار الله لها، كما كشفت تفاصيل تعرضها لضائقة مالية وخرجت منها بشيء يشبه المعجزات على حد قولها.
وقالت صفاء جلال، خلال حلولها ضيفة على برنامج لحظة تجلي، الذي تقدمه الزميلة منى عقبي، عبر القاهرة 24: أنا مؤمنة جدًا بالكرامة، ودخولي الشغلانة كان صدفة جدًا وربنا هو اللي اختار ده ليا.
وتابعت صفاء جلال: أنا على طول بكلم ربنا سبحانه وتعالى، وعارفة إن ربنا على طول واقف جنبي، ودايمًا لو في مشاكل أو الدنيا بتضيق بيا بلجأ لربنا وبقوله يا رب حلها من عندك، اللهم دبر لي فإني لا أحسن التدبير، ودايمًا ربنا بيخرجني من كل حاجة وحشة، وأكتر وقت هو شهر رمضان لما كله بينام بقعد اتكلم مع ربنا وأطلب منه اللي نفسي فيه، أنه يحفظلي حياتي وولادي وأمي، أنا علاقتي بـ ربنا علاقة قوية.
وأضافت: حصلت حاجة شبه المعجزات، من حوالي 10 سنين كان داخل عليا رمضان وكنت مخلصة كل شغلي، وكل الفلوس قبضتها وصرفتها، وكنت قاعدة قبل رمضان، ومقدرتش أعمل شنط رمضان وكنت متضايقة جدًا.
وأردفت: لقيت تليفون من حد قالي إن في حلقتين مكافأة ليا ورقم حلو وفي وقت صعب، والمسلسل كان خلص، وقولت أشكرك يا رب ولما بنعمل خير ربنا بيساعدك، إحنا اللي محتاجين نطلع صدقة مش الناس اللي محتاجاها، وأهم حاجة في الدنيا الستر والصحة، مهما كان معاك فلوس.
