شريف مدكور: مش عايز أخلف عشان ولادي ميتعرضوش للتنمر.. ومن حق الفنانات يلبسوا اللي هما عايزينه
تحدث الإعلامي شريف مدكور عن إصابته بمرض السرطان، وسبب عدم إنجابه، وأيضًا عن سبب تسميته بلقب مذيع ستات مصر.
وقال شريف في تصريحات تليفزيونية: اتصابت بالسرطان من كتر الشتيمة والتنمر وأنا في صراع مع المجتمع، ومكنتش بخلي أبويا وأمي يسمعوا الشتمية، ومش عايز أخلف عشان ولادي ميتعرضوش للتنمر.
وأضاف شريف: أنا مش من نوعية الناس اللي بتخاف ومعنديش مشكلة أخسر الجمهور بس مخسرش نفسي، وفي حاجات سياسية بتكلم فيها مش بتعجب الناس ودينية، وبطلع في وجه طفولي في شويه براءة عشان هو برنامج ترفيهي لأسرة.
شريف مدكور: صاحب الفضل عليا هو أنا.. وارتباطاتي بتبوظ بسبب طبعي الصعب
وعن سبب عدم ارتباطه حتى الآن، أوضح شريف: ارتباطاتي بتبوظ بسبب طبعي الصعب وعندي وسواس في النظافة، وصاحب الفضل عليا هو أنا وبحب نفسي جدًا.
واستكمل شريف: كنت مسافر باريس وجالي شاب برازيلي وقالي ليه المحجبات عندكم بتلبس لبس ضيق؟، وأنا بغير على ستات بلدي وفي مصممة أزياء جتلي البرنامج محجبة ولابسه ضيق مطلعتهاش عشان حاجه هتضر سمعة ديني وبلدي.
واختتم شريف حديثه: من حق الفنانات يلبسوا زي ما هما عايزين لكن المحجبات لاء، والمفروض اللي تتحجب متبقاش ملفتة.
