ميار الببلاوي تفجر مفاجأة جديدة في قضية تعذيب وفاء مكي للخادمتين
كشفت الفنانة ميار الببلاوي، تفاصيل قضية تعذيب الخادمتين التي تورطت بها الفنانة وفاء مكي، مؤكدة أن وفاء ليست بريئة -على حد قولها-.
وقالت ميار الببلاوي، خلال حوارها مع الإعلامية بسمة وهبة، في برنامجها العرافة، المذاع عبر شاشة قناة النهار: أنا مكتمتش حاجة خالص ووقتها مكنتش كبيرة كفاية، وفيه فرق لأني مكنتش فاهمة ومكنتش ملك نفسي ولا كنت في مصر ومكنتش عارفة أوصل لها، واللي حصل إن أنا كنت بسرد موقف لشخص وكان عندي اعتقاد إن وفاء بريئة، وهي مش بريئة ولا ليها أي علاقة بالبراءة، وأنا معيطتش مع هند عاكف خالص، ووفاء مكي طلعت وبتستغيث أنها مش لاقية تأكل ابنها وأنا دي زميلتي وقولت خلاص كفاية سيبوها في حالها.
وعن تفاصيل الواقعة، قالت ميار الببلاوي: واحدة جاتلي وجابتلي شغالات وأنا كنت طلباهم وكنت مستعجلة ورايحة فرح بنت خالتي، وأنا كنت محتاجاهم جدًا وقولت هاخدهم ولكن مطلعوش عندي وكل ده في مدخل العمارة وبشوف البنات لقيت واحدة فيهم نعسانة والتانية متضايقة، قولتلها أنتي جايباهم غصب عنهم ولا إيه؟ وقالتالي الاتنين بيشتغلوا مع بعض، والبنت كانت عايزة توريني إن شعرها محلوق، وقالتلي إن الأستاذة وفاء مكي قالت إن البنت عندها قُراع وحلقت لها شعرها، قولتلها عندها قُراع وجايباها لـ ابني؟ روحي أنا مش عايزاهم، هو ده اللي حصل، إيه بقى براءة وفاء في حاجة زي كده؟.
وأضافت: الطب الشرعي قال إن البنت مفيش عندها أي مرض جلدي، يعني التعذيب وقع شعرها واتحلق لها واتحرقت في شعرها وده اللي أقره الطب الشرعي، وبعدين أنا محدش طلب شهادتي، ووفاء ساعتها كانت بتصور مع فنانين كبار في مسلسل وكلهم شهدوا ومحدش خد بكلامهم لأن الطب الشرعي كان واضح.
وأكدت ميار الببلاوي، أن زوجها صاحة رسالة التهديد التي تلقتها حتى لا تذهب للشهادة في قضية وفاء مكي، قائلة: رسالة التهديد دي لعبة عملها جوزي علشان مش عايزني أفتح علينا فتوحات، وبعد ما رجعنا من سوريا قالي بطلي هبل وأنا اللي كنت بهددك.
واختتمت: أنا كلمت فارس حماد وقالولي كلامك لا هيقدم ولا هيأخر، وأنا راضية ضميري والست دي مش بريئة ولا ليها علاقة بالبراءة.
