مروان موسى: مطرب المهرجانات في مصر منافس قوي لـ ترافيس سكوت ببلده
حل مطرب الراب مروان موسى، ضيفًا على أحد البرامج التلفزيونية، وتحدث خلال اللقاء عن تفاصيل مشواره الفني وحياته الشخصية.
أبرز تصريحات مروان موسى
- نفسي نتفهم وعايزين نعمل حاجة نفرّح بيها الجمهور ونفسي الناس تساعدني على ده.
- في أسماء كبيرة في عالم الراب بقالهم فترة مش بتنزل حاجة.
- الرابرز في مصر مش بيحبوا بعض ومش بنعرف نتحد سوا وبينهم مشاكل كبيرة، وجمهور الراب صعب وبيجلدك.. وإحنا بنافس مصر برا.
- اللي اتظلم المهرجانات مش الراب، الراب خد حقه وطلعنا في إعلانات واتشافنا واتعمل لينا احترام أكتر، ودي متبسطنيش لأني عاشق للمهرجانات، الناس دي عملت حاجة من ولا حاجة، أنا كمستمع مقدر أعمل حاجة غير أني أقول الناس دي بأقل الإمكانيات خلوا أغنية تتسمع في مصر كلها، وهما مبيتقدروش فنيًا.
- إحنا بنخلط الطبقية بالفن وده سبب أن المهرجانات مخدتش حقها، واتهاجمت بس ومحدش قال دي بذرة حاجة رهيبة.
- مغني المهرجانات اللي أنت بتبصله كده ده، هو هو بالظبط ترافيس سكوت وفيفتي سينت، بس علشان الشخص ده برا فأنت شايفه غربي وجامد، وده عدم وعي.
- ندمان على ألبوم فلوريدا إني عملت 13 أغنية بشخصية واحدة.
- ندمان إني سمعت كلام مخرج كليب نهاية العالم، الناس عايزة تشوفني بغني مش بمثل.
- نقابة الموسيقيين بعتبرها بيتي وهي أكبر مكان بيدعمني في مصر، والأستاذ مصطفى كامل هو النقيب وبعتبره أخويا الكبير، وبيقولي جرب وشوف العازفين هتتبسط وإحنا في التجربة دي حاليًا، ومغني الراب في أمريكا بياخد قرار بعد ما بيوصل أنه عايز يطلع مع عازفين لايف.
- عايز في يوم من الأيام في حياتي أقول قصاد نفسي يا مروان أنت عملت في سنين شغلك أكتر حاجة أنا قادر عليها، وأني فعلًا عملت تأثير وشغل راضي عليه.
- عامل أكونت فيك عشان الأكونت بتاعي مشهور، فـ بدخل من أكونت فيك وأشوف تعليقات الناس عليا، واللي مش بيعجبني تعليقه بمسحه.
