أبرز تصريحات حمادة هلال: بفكر أعمل المداح فيلم كوميدي.. وماجد المصري اعتذر عن دور سميح لهذا السبب
حل الفنان حمادة هلال، ضيفًا على الإعلامية فاطمة مصطفى، في برنامجها الراديو بيضحك عبر إذاعة راديو 9090، وتحدث خلال اللقاء عن تفاصيل وكواليس مسلسل المداح 4، الذي يتم عرضه حاليًا ضمن السباق الرمضاني وحقق نجاحًا كبيرًا.
أبرز تصريحات حمادة هلال في الراديو 9090
- المداح كله مشاهده صعبة، وأكتر مشهد متعب نفسيًا بتاع أختي، والمشاهد اللي ببقى شايل همها هي مشاهد قفل بوابات الجن، علشان أشوف آيات مقولتهاش قبل كده في المشاهد والرؤية.
- مرجعنا هو السنة والقرآن، وأدعية النبي صلى الله عليه وسلم، وأدعية اللي اجتهدوا، وغير كده الرقابة مكنتش هتوافق وهما مش سايبنا في أي مشهد ودي حاجة تحترم.
- إحنا ذاكرنا كويس لأننا مينفعش نلعب بعقول الناس، والشارع بيقول أن الجزء الرابع من المداح ممتع ومقارنته صعبة.
- فكرت أعمل المداح فيلم رعب بدم خفيف، حتى أنا بلعبها سوشيال ميديا دلوقتي بشكل كوميدي عشان يكون في نفس، والناس بدأت تخاف، والسينما حلاوتها أنك تبقى قاعد مشدود مع الحدث.
- أحمد خالد موسى قالي ما تطلع بالمداح في العتاولة؟، ولكن منفذناش ده حسيت أن مش وقته.
- ماجد المصري للأسف اعتذر عن المداح 4، لأن هو اتطلب في مسلسل في السعودية وهيبقى صعب عليه، حتى قالنا طب ما تحاولوا تقللوا مساحة الدور شوية، وكلمنا الفنان فتحي عبد الوهاب وسبحان الله الدور مرسوم على فتحي.
- نهاية مسلسل المداح هتكون مفاجأة.
- مش حاسبها هل هيكون في جزء خامس ولا لأ، وأنا نفسي أعمل سلسلة المداح لأنه براند لوحده زي ألف ليلة وليلة، ونفسي الناس تبقى مرتبطة بالمداح في رمضان زي ما أنا مرتبط بـ رامز في رمضان.
- أنا قولت لرامز من 12 سنة أنه هيكون ذكريات في رمضان وهيكون علامة زي أستاذ سمير غانم وفطوطة.
- قولت لـ مخرج المداح لو ابني يوسف، مبيعرفش يمثل ارميه ومتعاملهوش بطريقة خاصة، وأنا تفاجأت أن يوسف بيستوعب صح وربنا يكتب له الخير.
- اللي كان مكتوب على الورق في مشهد قتل اختي لـ بنتها وطبخها كان صعب جدًا، وعملناه ببساطة والغرض منه أن نعرف الجمهور السبب أن وسوس لها الشيطان.
- حاولنا نوصل للجمهور أن مش أي حد عنده مغص يبقى معمول له عمل، وربنا مخلقش حاجة إلا وجعل لها شفاء في القرآن.
تصريحات حمادة هلال عن المداح
- أنا معنديش أني أتوقع نجاح أو فشل عمل، ولكن أنا بحلم بالمداح من وقت فيلم حلم العمر يعني من زمن.
- لما عملنا المداح الجزء الأول مكناش بنفكر نعمل جزء تاني، وبعدين لما عملنا أسطورة العودة قولنا ليه منعملهاش سلسلة؟، والحمد لله لقينا الأفكار، وعالجنا الحاجة اللي كانت ضعيفة معانا في الأجزاء الأولى في الجزء الرابع.
- فتحي عبد الوهب تعب وشقي في المسلسل وأضاف لينا إضافة كبيرة أوي.
- كان المفروض يظهر شيطان جديد في نهاية المداح والبوابة بتاعته تتفتح من بابل في العراق، وده من القرآن الكريم، ولكن علشان نطلع تصاريح ونعمل ده هنخلص تصوير بعد العيد الكبير، وقررنا نعمله في مصر ولكن غيرنا فيها حاجات.
