أبرز تصريحات محمد ممدوح مع عمرو أديب: خسرت 45 كيلو بسبب شربي للمياه
حل الفنان محمد ممدوح الشهير بـ تايسون ضيفا على الإعلامي عمرو أديب والمطربة أصالة، في بودكاست Big time، حيث كشف خلال اللقاء سر فقدانه 45 كيلو من وزنه، هذا بجانب المهن التي عمل بها قبل دخوله عالم التمثيل، بالإضافة لحديثه عن أكثر لحظة فارقة ومؤثرة في حياته.
ونستعرض لكم في هذا التقرير أبرز تصريحات محمد ممدوح مع عمرو أديب في بودكاست Big Time:
- قعدت 17 يوم بدون أكل كنت بشرب 7 لتر مية في اليوم، خسيت فيهم 45 كيلو.
- بنصح الجمهور بعدم الإكثار في شرب المياه لأنه بيعمل تسمم مائي.
- مينفعش تشرب في ساعة 3 أزايز مية، أنا بعد ما خسيت صحتي ظبطت ونفسي وصوتي أتحسن.
- كنت بشرب سجاير كتير ربنا كرمني وبطلت.
- اللي كان بينزل مني سموم مش دهون.
- دخلت كلية الحقوق بسبب أهلي مكنتش بحبها، وقعدت فيها أكتر من العميد.
- عيب مينفعش يتقال عليا محامي.
تصريحات محمد ممدوح مع عمرو أديب
- حاولت أمارسها المهنة نزلت تدريب القاضي كان هيسجني أنا والمحامي اللي معايا، لأن المحامي شخط فيا قدام القاضي زعقت له، القاضي ضحك وكان هيحبسني أنا وهو.
- معرفش ليه بيحبوني لكن ده كرم من عند ربنا، والموضوع ده فيه حسد، بس هو في واحد جان يعرق بالمنظر ده.
- نفسي أكون أب كويس، بقعد في البيت كتير، بحاول أعوض بنتي وزوجتي عن فترات انشغالي.
- حضرت ولادة بنتي، وكانوا هيطلعوني من غرفة العمليات لأني بضحك مراتي.
- بنتي مسكت صباعي وفضلت قافشة في إيدي أول ما أتولدت، ومكنتش عارف أتعامل معاها.
- اشتغلت في قهوة كنت بعمل شاي وأنزل طلبات.
- كنت بفتح مشروع أكل أول يوم في الافتتاح الفرن ضرب في وشي.
- قعدت شهرين في البيت كنت بهرس الأكل عشان أكله بشفاطه، لأن بوقي كان مقفول من الجروح، وناس خدوا مكاني في المحل.
وتراهن عمرو أديب والفنان محمد ممدوح خلال الحلقة، حيث أكد الإعلامي أن ممدوح سوف يعود لوزنه مرة أخرى، وفي تلك الحالة سيأخذ من ممدوح ألف دولار، أما في حالة خسارته الرهان سيدفع لممدوح المبلغ.
