فتاة تحذر: ركبت مع سائق أوبر وغيّر الطريق عدة مرات.. ومدانيش الشنطة غير لما دفعت 500 جنيه | تفاصيل
نشبت مشادة كلامية بين فتاة وسائق أوبر - شركة توصيل مواطنين- بعذ اتخاذ السائق طريقًا مغايرًا عن الطريق المحد له للتوجه إلى مطار القاهرة كما ترغب الراكبة، بالإضافة إلى خلافهما على أجرة الركوب، حتى وصل الأمر إلى تهديد الفتاة بالاستيلاء على حقيبتها في حال لم تنصع لطلباته، واكتشفت الفتاة فيما بعد أن السائق له تقييم سلبي، لمحاولته في السابق خطف بعض الفتيات.
تفاصيل استغاثة فتاة من سائق أوبر
وقالت حبيبة أسامة فتاة أوبر لـ القاهرة 24: في البداية أنا كنت طالبة عشان أروح مطار القاهرة، ولما نزلت وحطيت الشنطة في العربية وركبت السواق قالي إن هو ساكن في مدينة نصر، وكده كده هيرجع على هناك من أكتوبر عشان كده قبل الرحله بـ 200 جنيه بس، وطلب مني يزود قولتله هو الابلكيشن محددها كده وأنا كده كده بدفع الكارتة قالي بس أوبر عنده مكتوب فيه إن الرحلة بـ 500 جنيه.
وتابعت: جربت من عندي لقيت من البيت للمطار 258 جنيه بالظبط فقولتله خلاص هطلب أنا أوبر ونزلت من العربية قالي طب اطلبي دلوقتي وأنا هقبل قولتله لو حضرتك شايف السعر قليل عادي هطلب حد تاني قالي لا والله أنا كده كده رايح وساكن هناك ولازم تركبي تاني وعيب تنزلي، وكان عدى ربع ساعة بنتكلم قولت أخلص وأركب عشان الحق الطيارة.
وأضافت الفتاة: المهم واحنا لسه في أكتوبر فضل يدخل طرق غريبة ودخلني طريق مقطوع ومكتوب عليه إنه مصنع الخليج أو حاجة زي كده، وقتها بعتت لايف لوكيشن لأهلي وقولتلهم كلموني، وفضلوا يتصلوا بيا عشان يحسسوه إن في حد مستنيني فسألته هو ايه الطريق ده قالي لا ده اللوكيشن قولتله هو ليه جايبنا من هنا سكت ولف ورجع على الطريق السريع وكان بيتوه كتير وبعد ساعة كنت لسه مطلعتش من أكتوبر أصلا والطريق كله المفروض ساعة وبدأت اتأخر على الطيارة بعدين لقيته بيقولي ممكن تظبطي اللوكيشن عند الصالة قولتله ما هو جوا المطار قالي لا حطيه عند الصالة، قولتلهم الصالة مش موجودة عاللوكيشن أصلا، أنا دايما لما بطلب هو بيدخلني عشان كل الصالات جمب بعض، فقالي طب حطي رقم الصالة بس قولتله مش موجودة مش لاقياها، قالي طب هاتي كده وخد الموبايل حط لوكيشن تاني والمسافه زادت من 260 جنيه بقى بـ 488 جنيه.
وواصلت فتاة أوبر حديثها، قائلة: لما شوفت قولتله ده مش منطقي عشان تمشي مترين زيادة أدفع 200 جنيه قعد يجادلني كتير قولتله طب ممكن توصلني اللوكيشن القديم وهديك فلوسك قالي هو اللوكيشن كان فين قولتله نزلني قدام المطار فوقف مكان فيه ميكروباصات وقالي اللوكيشن هنا قولتله ده اللوكيشن مش قولتلي إنه قدام المطار؟ قام مشي تاني وقالي هنزلك حته أقرب لقيته بيدخل في شوارع وده مش طريق المطار والطيارة لسه عليها نص ساعة ويقفلوا الكاونتر فقولتله ممكن تنزلني هنا عشان الحق أطلب حد تاني مكانش راضي لحد ما زعقتله وطلبت منه كذا مره ينزلني.
وأردف: وقف في مكان كله عربيات شحن الكبيرة دي ونزلت واديته 260 جنيه قعد يقولي ممكن تدفعيلي 500 ده تمن الرحلة قولتله هو مش حضرتك نزلتني في اللوكيشن القديم اللي بتقول عليه يبقى ليه أدفع سعر الرحلة قالي ماليش دعوة ده حقي لازم تدفعي قولتله ممكن الشنطة عايزة الحق الطيارة قالي مفيش شنطة غير لما تدفعي وقعد يزعق وأنا عايزة حد يلحقني بس كان كله عربيات ولو كنت بعدت كان ممكن ياخد الشنطة ويمشي بالعربية وماما وإخواتي كانوا معايا على التلفون وسامعين الخناقة وهو عمال يزعق ورافض يديني شنطتي قالولي اديله الفلوس وهنتصرف بعدين فاديته الفلوس وخدت الشنطة ومشي وفضلت واقفه في طريق ضل بالشنط لحد ما واحد تاني جالي.
