هنسجلها لكن متحضرش.. سيدة تشكو من رفض استقبال ابنتها الكفيفة بمدارس أكتوبر
اشتكت سيدة تدعى عائشة حسان، من رفض المدارس الخاصة بمنطقة أكتوبر تسجيل ابنتها، بسبب أنها من ذوي الإعاقة البصرية، رغم جهودها في توفير كل ما تحتاجه ابنتها للدراسة.
رفض المدارس لطفلة كفيفة
وقالت في حديثها مع القاهرة 24، إن ابنتها ليان 4 سنوات، تعرضت لرفض تام من قبل أغلب المدارس، التي سعت إلى أن تسجل لها بها، بداية العام بمنطقة أكتوبر.
وتابعت: بنتي اترفضت من المدارس عشان مش بتشوف.. حاولت أقدم في أكثر من مدرسة خاصة، وكان هناك رفض تام.
وأضافت: بنتي اترفضت من المدارس عشان كفيفة، لكن مش معنى إنها مش بتشوف يبقى متتعلمش، أسباب الرفض في أغلب الحالات كانت بتبقى مجهولة وبـ يكتفوا بـ هنشوف ونرد عليكم، ومدارس تانية قالت لي هنقبل بس هناخد فلوس كتير.
تحمل كافة المتطلبات
وتابعت: كنت بروح للمدير أو المديرة وأقولهم أنا هوفر لـ البنت كل حاجة، بين أدوات وكورسات للمُدرسين عشان يعرفوا يتعاملوا معاها ازاي، وأي حاجة المدرسة هتحتاجها هجيبها، لكنها فُوجئت برد إحدى المدارس الخاصة: هنكتفي بتسجيل اسمها في قوائم الملتحقين بالمدرسة مقابل دفع المصروفات المدرسية، لكن متحضرش.
الأم: عايزة أحل المشكلة
وأكدت والدة ليان: مش قصدي أعمل به تريند.. لكن من قهرتي على بنتي اتكلمت.. وقلت يمكن أقدر أساعد الناس اللي عندها نفس المشكلة.
رسالة توعية للجميع
وأعربت عن رغبتها في توصيل رسالة للجميع: يا جماعة مادام الطفل معندوش مشكلة عقلية خطيرة، فهو من حقه إنه يتعلم ويندمج مع أصدقائه في المدرسة، وفي نفس الوقت مش من حق حد يتنمر عليه، ودور المدرسة إنها توعي إننا مختلفين مش ترفضهم.. المدارس دي لازم تتحاسب قانونيًا.
