المتهم بدهس طبيبة التجمع: اتفاجئت بيها وأنا بلف اليوتيرن.. ومعرفتش أتفاداها| فيديو
يواصل القاهرة 24 نشر نص تحقيقات واقعة اصطدام شاب يبلغ من العمر 18 عامًا، بفتاة عشرينية خلال سيرها في شارع التسعين بمنقطة التجمع الخامس، خلال سباقه مع صديق له على الطريق السريع، مما تسبب في إصابتها بنزيف حاد في المخ، وكسور شديدة وفقدان في الوعي.
تحقيقات المتهم بدهس طبيبة التجمع
وجاءت اعترافات المتهم:
اللي حصل إن امبارح 2024/2/12 حوالي الساعة 10 بالليل أنا ماشي بالعربية بتاعتي عند تقاطع شارع الجزيرة في التسعين الجنوبي وعديت اليوترن وماشي في اقصى الشمال واتفاجئت، وأنا ماشي بسيدة تعبر الطريق من اليمين، من قدام عربية تانى وكانت مسرعة وترددت في العبور وأنا حاولت أفاديها ومعرفتش، واصطدمت بيها وحدثت إصابتها وأنا وقفت على طول ونزلت علشان أطمن عليها لقيت فيها إصابات رُحت اتصلت بالإسعاف، وجات اخدتها والشرطة جات وأخدوني وأخدوا العربية وجابوني على القسم وأنا كلمت حد من أهلي علشان يتابع حالة المصابة، وفعلا راحوا واطّمنوا عليها واتكفلوا بكل المصاريف في المستشفى، وعملوا المحضر وجابوني على هنا النهاردة ودا كل اللي حصل.
س: متى وأين حدثت تلك المصادمة؟
ج: الكلام ده ١٢-٢-٢٠٢٤ عند تقاطع شارع الجزيرة بالتسعين الجنوبي التجمع الخامس الساعة حوالي ١٠ بالليل.
س: ما سبب تواجدك بالمكان والزمان سالف الذكر؟
ج: كنت مروح على بيتى في التجمع الأول.
س: من كان برفقتك ؟
ج: كنت لوحدي.
س: وما هي السرعة التي كنت تقود بها السيارة آنفة البيان؟
ج: أنا كنت ماشي على سرعة بطيئة خالص علشان كنت خارج من الملف.
س: وما هي حالة الضوء والرؤية بالطريق؟
ج: الرؤية واضحة علشان في أعمدة إنارة.
س: وهل كان الطريق ممهد للسير عليه؟
ج: أيوة كان ممهد.
س وما هي عدد حارات الطريق؟
ج هو كان 4 حارات تقريبًا.
س: صف لنا مكان وقوع الحادث؟
ج: هو طريق أسفلتي مكون من أربع حارات وأنا كنت بلف من الملف اللي في تقاطع شارع الجزيرة.
س: وما هي وجهتك أثناء قيادتك السيارة؟
ج: أنا كنت قادم من شارع التسعين الجنوبي قدام تقاطع شارع الجزيرة اتجاه الجامعة الأمريكية.
س: وما هي المسافة التي كانت تفصل فيما بينك وبين المصابة تسنيم عزت بسطاوي؟
ج: هي كانت حوالى 10 متر.
س: وما هي الحالة التي أبصرت عليها المجنى عليها لأول وهلة؟
ج: هي كانت ماشية بتعدى الطريق وأنا كنت ماشى في أقصى الشمال علشان كنت هلف من اليوتيرن وكانت ماشية بسرعة وأنا اتفاجئت بيها بتعدي من قدام العربية اللي كانت على يميني، واترددت وأنا حاولت أفاديها ومعرفتش وحصلت إصابتها.
س: وهل من ثمة إصابات نتجت من جراء ذلك الحادث؟
ج: ايوة.
س: وما هي طبيعة تلك الإصابات تحديدا؟
ج: هو كان في جروح في وشها ومعرفش باقي الإصابات اللي فيها علشان أنا مروحتش معاها المستشفى والشرطة أخدتني.
س: وهل كان بإمكانك تفادي وقوع ذلك الحادث؟
ج: لا.
