إيناس الدغيدي لـ أميرة بدر: علاقتي بربنا قوية رغم إني مش متدينة.. وعملت 30 عمرة ومش بسمع شيوخ
علقت المخرجة إيناس الدغيدي على علاقتها بربنا وتصريحاتها الدينية المثيرة للجدل، وعن عدم سماعها للشيوخ، وعلاقتها بوالدها ووصفها له بأنه رجل متفتح.
إيناس الدغيدي: عندي أفكار معينة عن ربنا رغم إني مش متدينة
وقالت إيناس الدغيدي خلال برنامج أسرار التي تقدمه الإعلامية أميرة بدر على قناة النهار: عندي أفكار معينة عن ربنا، قلت قبل كده العلاقة بيني وبين ربنا اللي بتاخدها الناس باستهزاء، الناس واخدة جرأتي إني متكلمش عن ربنا عشان الحتة الدينية، وعلاقتي قوية جدًا بربنا، وكل يوم بشكر ربنا رغم إني مش متدينة وعندي جملة خدتها من علم الطاقة، أنا بدرس طاقة أونلاين، والجملة هي: اللهم إني أحبك فأحببني فيك أكثر ياالله، الجملة دي ممكن أعيط فيها، بقولها طول مانا سايقة لوحدي لأني بحب أسوق، بحس إني في علاقة بيني وبين ربنا، عشان كل اللي بيتقال عليا.
وأضافت إيناس: مبسمعش شيوخ، ولو سمعت مبديلهمش أي اهتمام، ووالدي طول حياتنا كان بيكلمنا في الدين، وكان رجل متفتح ومن طفولتي بتعلم دين، حجيت مرتين وعملت حوالي 30 عمرة، أول مرة رحت حسيت بحاجة غريبة لكن بعد كده بتبقى طقوس أكتر من إحساس، ومادعيتش عشان كنت بعيط، وطلبت الشهرة والفلوس والمجد، وعمري ما ندمت على أي حاجة صرحت بيها، ومش ندمانة على أي فعل بما فيهم الأفعال اللي مش كويسة في نظر الناس، الخطأ والصواب بنتعلمه، ومش ندمانة على تصريح الحجاب، ووالدتي ماتت 80 سنة ومكانتش محجبة وده مش معناه إنها مش كويسة، واحنا متدينين جدًا وكنا نلبس ميني جيب، وأنا في الحج رحت بشعري وأول ما نزلت هناك اتحجبت ومكنتش طايقة ده، مبهتمش أشوف فرض ولا لأ المهم أنا عايزه ولا لا، وعملت الخط بتاع الحجاب ده في فيلم امرأة واحدة لا تكفي.
برنامج أسرار
وبرنامج أسرار تقدمه الإعلامية أميرة بدر على شاشة النهار يوميًا خلال شهر رمضان، في الساعة التاسعة والنصف مساءً، تستضيف من خلاله عددا من نجوم الفن والرياضة والسياسة في مصر.
