مي كساب عن تعاونها مع أحمد السقا في العتاولة: كان حلم وربنا حققهولي.. ورمضان الجاي هطلع سينجل
علقت الفنانة مي كساب، على الهجوم الذي طال مسلسل العتاولة بطولة أحمد السقا وطارق لطفي وباسم سمرة، خلال الفترة الأخيرة، حيث زعم البعض أن العمل يحرض على العنف.
وتحدثت مي كساب، مع الإعلامية سارة الدندراوي، في برنامجها تفاعلكم: المسلسل بيتكلم على الخير والشر وده موجود بينا، وبنقدم من خلاله نموذجين سيئين، والاتنين حرامية وسيئين في الأول والآخر، وبنقول للناس إن النهاية هتكون وحشة أكيد بس مش بنشجعهم يكونوا كده، وهنشوف في الآخر مين اللي هينتصر.
أما عن بعدها عن أولادها بسببب تصوير باقي مشاهدها بمسلسل العتاولة في بيروت، فعلقت مي كساب قائلة: كل يوم بعيط مع أولادي على التلفون، عياط جماعي.
وأضافت عن ردود الفعل التي تلقتها من المسلسل على شخصيتها: الحمد والشكر لله، وللمخرج أحمد خالد موسى وده كان اتفاق مسبق بيني وبينه إنه يقدمني بشكل مختلف للجمهور، وكان قد كلامه وتوجيهاته قدرت أخرج الشخصية بشكل مختلف.
وتابعت: الشخصية مختلة من أول مشهد وكنا قاصدين نعمل ده وده وصل للجمهور بشكل كويس، وكمان بقول للمخرج إن مافيش حد عدى من قدام الكاميرا في مشهد ومكنش عتيل من العتاولة، وقولت للسقا كان حلم من أحلامي إني أقف جمبك في عمل وربنا حققلي الحلم ده.
مي كساب تكشف معاناتها مع فقد وزنها
كما كشفت مي كساب، عن معاناتها مع فقدان وزنها خلال مسلسل العتاولة، قائلة: نفسي أزيد 10 كيلو مافيش سمنة بلدي في بيروت، ولا رقاق ولا كسكسي، ونصيحتي لأي حد في مصر يتسحر طاجن رز معمر، وأنا مستمتعة بالرفع لأني كنت بعاني من السمنة، وهتخن للجمهور خمسة كيلو عشان خايفين عليا، ورمضان الجاي هطلع سينجل.
