صاحبة مائدة الرحمن المحترقة أمام مسجد السلطان أبو العلا: بقالي 15 سنة بعملها وهستمر | فيديو

قالت صاحبة مائدة الإفطار ببولاق أبو العلا، إن الـ حريق نشب في المائدة وامتد إلى محيط مسجد السلطان بولاق أبو العلا التاريخي، وتم السيطرة عليه من قبل الحماية المدنية قبل أن يمتد للمناطق المجاورة ويتسبب في حدوث خسائر مادية أو بشرية في الأرواح.

احتراق مائدة رحمن ببولاق أبو العلا

وأشارت صاحبة مائدة الإفطار، إلى إنها دائما تحرص  كل رمضان أن تُقيم تلك المائدة طوال الشهر الكريم بجانب مسجد السلطان بولاق أبو العلا التاريخي، مردفة: الحمد لله كنت متعودة كل سنة في رمضان أعمل مائدة جنب المسجد، والدنيا كانت بتمشي معايا كويسة طول شهر رمضان.

وأوضحت أن الأمور كانت تسير بشكل طبيعي أثناء تجهيز الوجبات، لكن الطباخ فوجئ بحدوث مشكلة في أسطوانة الغاز مما أدى ذلك إلى انفجارها ونشوب الحريق.

واستكملت: الأنبوبة حصل فيها مشكلة والطباخ بيطبخ فضربت للأسف وضيعت كل حاجة والعدة اللي كنا بنستخدمها.. ولكن الحمد لله إن مفيش حد من الناس حصله حاجة والخسائر كلها مادية.

ولفتت صاحبة مائدة الإفطار إلى أنها تنظم تلك المائدة خلال شهر رمضان المبارك منذ أكثر من 10 سنوات، معلقة: الحمد لله كل اللي كانوا شغالين معايا محصلش ليهم حاجة وربنا سترها معايا عشان دي حاجة لله، وكل حاجة باظت مني تتعوض مش مشكلة المهم إن الناس بخير، وهستمر في المائدة في السنين اللي جاية عشان دي رزق الغلابة.