مجدي الجلاد لـ أميرة بدر: عمرو أديب رقم 1 في الوطن العربي.. وتوفيق عكاشة أحسن من 80% من الموجودين دلوقتي
عبر الكاتب الصحفي مجدي الجلاد عن موقفه تجاه حصول الإعلامي عمرو أديب على الجنسية السعودية، قائلا: عمرو أديب خد الجنسية السعودية ومعرفش الموضوع وراه سر ولا لا، وعادي إنه ياخد الجنسية طالما متخلاش عن جنسيته المصرية، وأنا بحب السعودية وعشت فيها فترة، واسمي هناك أبو أحمد، ومعايا الجنسية السعودية، وأصدقائي سعوديين، والجنسية مش جواز سفر دي هوى، وعمرو أديب صديقي وزميلي من أولى جامعة، وكلت معاه سندوتشات حلاوة بالقشطة مامته عاملاها، وهو الإعلامي رقم واحد في الوطن العربي أداءً وكفاءة، ولا أؤاخذه بحصوله على الجنسية السعودية.
وقال الكاتب الصحفي مجدي الجلاد، خلال استضافته ببرنامج أسرار مع الإعلامية أميرة بدر المذاع على قناة النهار: من كتر العبث على السوشيال ميديا وبعض وسائل الإعلام ومن كتر إعلاء قيمة وحجم الفتنة، بقينا بنشوف إن ده الصح والصح غلط، يعني لو قلت الكلام ده من 50 سنة إن فنان خد جنسية كان عادي ولا كان حصل أي حاجة في المجتمع، لأنه كان مجتمع صحي، هو ليه بنقول السعودية بتاخد النجوم وتكرمهم ونعترض، ده اسمه خلل في زاوية الرؤية، لأن أي دولة شقيقة أو غير شقيقة لما تُكرم فنان مصري يبقى بتكرم الفن المصري، طب نقول إيه لأم كلثوم لما كانت عربيتها بتتشال بيها في تونس، وعبد الحليم لما لبس الغترة والعقال وغنى مع الخليجيين خليجي، وعمرو أديب مغلطش.
مجدي الجلاد لـ أميرة بدر: توفيق عكاشة أحسن من 80% من الموجودين دلوقتي
وأضاف الجلاد قائلًا: أتمنى توفيق عكاشة يرجع للمشهد الإعلامي، لأنه أحسن من ناس كتير موجودة، وله مشاهدين، بغض النظر عن الشريحة اللي بيخاطبها، وهي مختلفة عن اللي أنا بخاطبها، وهو مهنيًا أفضل من 80% من اللي موجودين دلوقتي.
وبرنامج أسرار تقدمه الإعلامية أميرة بدر على شاشة النهار يوميا خلال شهر رمضان، في الساعة التاسعة والنصف مساءً، تستضيف من خلاله عددا من نجوم الفن والرياضة والسياسة في مصر.
