تحقيقات قضية نيرة صلاح تكشف مفاجأة.. لماذا طلب العميد من المتهم ترك إدارة جروب الدفعة؟
كشف التحقيقات في قضية طالبة العريش نيرة صلاح، التي توفيت نتيجة تناول حبة الغلة داخل المدينة الجامعية بالعريش، تفاصيل جديدة.
تحقيقات قضية طالبة العريش نيرة صلاح
وحصل القاهرة 24 على نص التحقيقات في قضية نيرة صلاح، طالبة جامعة العريش، حيث جاءت أقوال المتهم الثاني طه كالآتي: أنا أعرف نيرة من أول العام الدراسي في شهر 10، وعلاقتي بيها علاقة زمالة عادية، وبعدين شروق المتهمة الأولى في القضية كانت بتشتكيلي منها، وإنها بتجيب في سيرتها وبتجيب في سيرتي، وكانت بتقول إني باخد من فلوس الطلاب الخاصة بالسي دي بتاع المواد اللي إحنا بندرسها.
أقوال المتهمين في قضية نيرة صلاح طالبة العريش
وتابع المتهم في قضية نيرة صلاح: السي دي ده كان بـ 600 جنيه، وغلي بقي بـ 800 فهي فاكرة إني باخد الـ 200 دول وبحطهم في جيبي وابتدت تتكلم عليا زي ما بتتكلم على شروق، ويتقول إني بسرق في الملازم وشروق ماشية مشي بطال وإني ماشي معاها، وأنا أدمن جروب الدفعة أنا وشروق وبعدين أنا لقيت شروق متضايقة، ولقيت شات بين نيرة وواحد اسمه باسم.
وأضاف المتهم في قضية نيرة صلاح: قلت لشروق ملكيش دعوة بيها فهي قالت عاوزة أنصحها وبعدين عرفت من شروق إنهم واجهوها بالشات، فهي طلبت إن هي تسيب الأوضة زي ما شروق حكتلي وبعدين شروق جت قالت لي إن نيرة بتتكلم عليها، فأنا قلت لـ شروق تحذرها إن لو اتكلمت عنك تاني إنك تدخلي أهلك في الموضوع، وبعد كده لما ما سمعتش الكلام حصل موضوع الجروب اللي هو كان مضمونه إن لو ما بطلتيش كلام علينا هنروح لعميد الكلية، وهنروح نقول علي اللي هي بتقول عليه.
مفاجآت قضية طالبة العريش نيرة صلاح
وتابع المتهم في قضية نيرة صلاح: إحنا كنا بنتكلم على المتغطي عشان محدش يعرف إن إحنا بنتكلم على نيرة، وموضوع الجروب ده مكملش ساعة بس كان مضمونه إن إحنا نحذر نيرة من عدم الخوض في أسامينا، علشان ما نتخذش الإجراءات القانونية، وبعد كده يوسف زميلي كلمني إن نيرة بتقول عنكم بتقصدوها في الجروب، وأنا قلت له إحنا مش عايزين منها غير إن هي تبطل كلام علينا.
وأكمل المتهم: قولت لزميلي على الحاجات اللي شروق ورتهالي، وطلبت منه إن هي بس ما تجيبش سيرتنا على لسانها، وهو قال هشوف الموضوع ده وأحله وبعدها رحت يوم السبت الكلية الصبح لقيت وكيل الكلية الدكتور حاتم بينادي عليا، بيقولي عاوزين حد يمسك جروب الدفعة مكاني، فبقوله ليه يادكتور؟، فقال علشان اللي بينكم على الجروب.
سر اعتذار نيرة صلاح لوالدة المتهمة بابتزازها
وأضاف المتهم في قضية نيرة صلاح: اتصل بيا يوسف وقال إن إحنا عاوزين نحل الموضوع ودي، فقلت له الوكيل عرف وكده كده الجامعة هتتصرف، والساعة 4 لقيت شروق جاية بتقول لي إن نيرة اتأسفت ليها على الخاص، فأم شروق كلمت نيرة، وقالت لها لو ما اعتذرتيش خلال ربع ساعة هناخد الإجراءات القانونية، فأنا رحت ناقل الكلمتين دول ليوسف عن طريق التليفون، وقلتله يا يوسف أم شروق كلمت نيرة وقالت لها لو ما اعتذرتيش خلال ربع ساعة هتتخذ الإجراءات القانونية، وبعدين نيرة نزلت اعتذار على الجروب، مضمونه إن هي بتتأسف لشروق ومريم وولاء، على أي كلمة قالتها عليهم قبل كده.
وتابع: بعدين كنا قاعدين في كافيه بره، أنا وشروق وحبيبة لحد قبل الامتحان ودخلنا الامتحان مادة الهستولوجي وبعدها خلصت الامتحان حوالي الساعة سبعة وربع، وبعد كده عرفت إن نيرة جالها رتجاع وعرفت من شروق إن البنات بتقول إن هي خدت حباية غلة، ولما رحت المستشفى قعدت شوية وقالوا عنها ماتت.
