تامر عبد المنعم عن فارس أحلام نادية الجندي: السن ده الواحد يفكر في عزرائيل
علق الفنان تامر عبد المنعم، على تصريحاته السابقة عن الفنانة نادية الجندي، بشأن بحثها عن فارس أحلامها، بجانب تفاصيل خلافه مع مؤدي المهرجانات الشعبية حمو بيكا.
وقال تامر عبد المنعم، في حواره مع الإعلامية بسمة وهبة، في برنامجها العرافة، المذاع عبر شاشة قناة النهار: الفنان نادية الجندي لم تتخط الـ 85 سنة، هل البوست اللي كتبته على فيسبوك كان فيه اسمها؟ إن بعد الظن إثم، ولو كان حد عدى الـ 85 سنة وبيدور على فارس أحلامه يبقى عيب اختشي يا ولية أيًا كانت مين، والسن ده الواحد يفكر في عزرائيل، فارس أحلام إيه هذا السن لا يصلح للجواز.
أما عن تفاصيل خلافه مع مؤدي المهرجانات الشعبية، حمو بيكا، فعلق تامر عبد المنعم: حمو بيكا مقرأش اللي أنا كتبته وقالولي مبيعرفش يقرأ، فقولت له شوف حد بيعرف يقرأ ويقرأ لك اللي كتبته، ولما ييجي عليا الزمن وحمو بيكا يقولي نضف قلبك وشوفلك فيلم تمثله، يبقى الحمد لله على أني قولتله شوف حد بيعرف يقرأ ويقرألك، وأنا فنان وحمو بيكا مش فنان، والفنان لما يكون بيجبوه علشان يبقى نمرة فكاهية وحد يطلع يجعر في فرح والناس تتفرج عليه، يبقى نسمي القرد فنان لما القراداتي بيجيبه والناس تتفرج عليه.
وتابع تامر عبد المنعم: النجوم في مصر قليلين للغاية ممكن يكونوا 15 بالكتير، ولكن الأكيد أن حمو بيكا مش من ضمنهم، ولو أنا النقيب مكنتش هديله تصريح، ولو أنا الرقيب مش هخلي حمو بيكا يغني لأن ده مش غنا، ده بزاءة وأنا مبحبش المهرجانات، وحمو بيكا مبيعرفش يغني خالص.
