علاء مرسي عن أزمة بيومي فؤاد: اللي حصل لغط وفتنة كبيرة.. وسلاّم اتهم السعودية بالباطل
علق الفنان علاء مرسي، على أزمة الفنان بيومي فؤاد والفنان محمد سلام، مشيرًا إلى أنه متضامن مع سلام في جانب، ومع بيومي في جانب آخر.
وقال علاء مرسي خلال لقائه مع القاهرة 24: اللي حصل في موضوع سلام وبيومي لغط وفتنة كبيرة على السوشيال ميديا، وأنا لا أعترف بفتنة السوشيال، ولا أعترف بكل من يقول رأيا صادما من غير قواعد وأدلة، وأنا من الناس اللي تضامنت في جزء مع سلام وجزء مع بيومي.
وأضاف علاء مرسي: الجزء اللي تضامنت فيه من عند سلام إنه رجل وشاب تعاطف مع أخواتنا فعبر، وغيره تعاطف فبكى مع نفسه وغيرهم تعاطف وقال يا رب انصر اخواتنا، كل واحد عنده طريقة تعبير، ولكن ما ينفعش اربط طريقة تعبيري بشغلتي.. يعني هل ينفع بتوع أوبر يقفوا وبتوع الصحافة ما يكتبوش ويسافروا فورا غزة.
وتابع: إحنا تحت إمارة دولة ودولة يحكمها شخص هو اللي يسمح لي أروح هناك ولا م أروحش.. وبما اننا مش في إيدنا نروح ممكن نساعد بطرق أخرى، زي أننا ممكن أقدم معونات وندعي لهم ونتعاطف معاهم، ومفيش حد مهما كانت ديانته ما بكاش على أطفال غزة.
وواصل علاء مرسي: أحداث غزة مش جديدة أحداث غزة ولكن حصلت في 2005 و2002 وألعن من دلوقتي، لكن إحنا بننسى التاريخ، ومحتاجين في البداية ندرس إسرائيل والصهوينية وفلسطين الدولة العظيمة والشعب الكبير اللي قلوبنا بتقطر دما علشانهم، علشان هما اخوتنا وأهلنا ومينفعش أربط ده بشغلي.
علاء مرسي لـ محمد سلام: أنت غلطت غلطتين
واستكمل علاء مرسي: لما سلام يقول مقدرش أمشي علشان أروح بلد تاني وأرقص أنت كده غلطت غلطتنين لأنك اتهمت البلد التانية اتهام باطل، وهم من أكثر الدول الداعمة للقضية الفلسطينية من أيام الملك عبد الله والملك سلمان وبتدعم اخواتنا الفلسطينيين ودي حقيقة وموجودة في التاريخ، وإيه يعني لما يعملوا احتفالات دي دولة بتنهض ولو عندي ابني عيان هل أبوه وأمه مش هيودوا اخواته المدرسة وامهم متعملش أكل؟.
