سعاد صالح: خدمة الزوجة لزوجها غير واجبة لكن مستحبة.. وليس من حقها أن تشترط عليه ميتجوزش

علقت الدكتورة سعاد صالح أستاذ الفقه المقارن بجامعة الأزهر على الشهوة في المناسبات الدينية وأعمال السحر قائلة: الأكل الكتير في المناسبات الدينية تعتبر شراهة وبستغرب أن الأسعار بتغلى ولما المناسبات بتيجي الفلوس بتظهر، وشهر رمضان لكسر حدة الشهوة لأن الصوم وقاية من الوقوع في المحذورات، وربنا قال لعلكم تتقون، وياريت نمشي على أدنا، وفيه فرق بين صوم مبرور وصوم مقبول، اللي بيعمل كده صومه مقبول، أما اللي بيتحكم في الشهوات صومه مبرور، وأجره عند الله أفضل.

 سعاد صالح: الاسعار بتغلى وفي المناسبات الدينية الفلوس بتظهر

‎وقالت الدكتورة سعاد صالح، خلال استضافتها ببرنامج "أسرار" مع الإعلامية أميرة بدر المذاع على قناة النهار: الأعمال والسحر موجودين لكن مش تخصصي لأن تخصصي فقه أما ده يتعلق بالعقيدة، وفيه فنانين بتروح مخصوص تعمل سحر وشعوذة، وده مش كفر لكنه معصية، مش لدرجة الكفر، وده يؤدي للوقوع في المعصية، وربنا نهى عنه، ويجب أن يكون فيه دور لعلماء الدين لمحاربة هذه الخرافات، لأنه يترتب عليها تأثيرات لا أخلاقية، يعني أي بنت لما تتأخر في الزواج وتروح لشيخ ويخدرها وياخد شهوته منها، وبيجيلي كتير حالات زي دي.

 سعاد صالح: الأعمال والسحر مش كفر لكنها معصية وفيه فنانين تستعين بالسحر والشعوذة

كما علقت الدكتورة سعاد صالح أستاذ الفقه المقارن بجامعة الأزهر على تعدد الزوجات وخدمة الزوجة لزوجها قائلة: إذا كان مفيش مبرر ودافع لزواج الرجل بأخرى ومعتدل بين الاتنين، فهو عاصي وآثم ومعاقب، البعض بيقول إنه معاه فلوس وبيعدل والزوجات مبسوطين، أنا أعرف أحد الشيوخ المشهورين بيخرج مع الأربعة في عربيته ومنقبات، والزواج بأخرى مشروط بالعدالة ورضا الزوجة واللي مش راضية تطلب الطلاق، ومش من حقها تشترط إنه ميتجوزش لكن تقول لو أتجوزت تاني أنا هتطلق.

سعاد صالح: خدمة الزوجة لزوجها غير واجبة لكن مستحبة.. وليس من حقها أن تشترط عليه إنه ميتجوزش

‎وقالت الدكتورة سعاد صالح، خلال استضافتها ببرنامج أسرارا مع الإعلامية أميرة بدر المذاع على قناة النهار: خدمة الزوجة للزوج غير واجبة، ولم يرد نص بالوجوب، وبنقول حسب قدرة الزوج، وبعض الفقهاء بيقولوا إن لو كانت الزوجة تُخدم قبل الزواج في بيت أهلها، فيجب على الزوج يجيب لها خادمة، أهم حاجة القدرة والتفاهم والتشاور، وخدمة الزوجة مستحبة من باب الإحسان، ولو معملتهاش لم تخالف نص، السيدة فاطمة ابنة الرسول ذهبت إلى الرسول تشتكي من الأعمال المنزلية والرسول عارف إن سيدنا علي غير قادر ليؤجر لها خادمة، فقال لها هرشدك لحل يخفف عنك، إنك تسبحي وتكبري وتحمدي الله 33 مرة وإن شاء الله ربنا هيعينك، والرسول منهاش لكن أرشدها لظروف زوجها.

سعاد صالح: الرجل المستهتر بحقوق بيته وزوجته تسقط عنه القوامة