رئيس إنبي: مشاركة الناشئين مكسبنا من مباراة الأهلي.. وأوفا أصيب بشد في الخلفية
علق أيمن الشريعي رئيس نادي إنبي على تعادل فريق ناديه أمام فريق النادي الأهلي الليلة، في المباراة المؤجلة من الجولة الثامنة لبطولة الدوري الممتاز.
تصريحات رئيس إنبي
وفي تصريحات تليفزيونية قال الشريعي: الأهم من التعادل والنتيجة هي الحالة اللي إحنا ماشيين عليها وأننا بنطلع ناشئين زي يوسف لبيب وإن دي أول مشاركة ليه معانا ويسجل جونين ويعمل نتيجة إيجابية، ولاعيبة كتير شاركت معانا من الناشئين ودا المكسب بتاع النهاردة.. إننا بنأكد على شغل نادي إنبي وأن عندنا لاعيبة كتير هيطلعوا يعملوا أداء محترم وأنا شايف أن دي حاجة تشرف وأنا ليا الشرف إني ضمن منظومة إنبي.
وأضاف: يوسف لبيب كان بيني وبينه مكالمة نارية من أربع أيام لأنه واقف مستني دوره في المشاركة لكن دايما الفرصة لما بتيجي بتيجي في توقيتات من عند ربنا والمهم تكون جاهز ودا اللي كنت بقوله ليوسف أنك بتاخد ثواب السعي ولما تيجي فرصتك ادعي ربنا أنك تكون موفق.
وواصل رئيس إنبي: الحمد لله ربنا كرم يوسف لبيب بجونين في النادي الأهلي وحاجة تديله دفعة قوية وبالنتيجة دي بغض النظر إحنا أول الدوري ولا لأ إنما نقدر نبني عليها للدور التاني وإن دي أول مرة في تاريخ إنبي ننهي الدور الأول بـ 28 نقطة لأن عمرنا ما وصلنا للرقم دا من 15 سنة كنا بنخلص دايما 21 أو 22 وكان معانا أسماء كبيرة وتشكيلة تخض لكن النهاردة أكدنا على مشروعنا وحطيناه نصب أعيننا وخلال سنتين تلاتة هيكون لينا شأن كويس اعتقد كده.
واختتم الشريعي تصريحاته بالكشف عن تفاصيل إصابة مهاجم ناديه أحمد أمين أوفا قائلًا: أحمد أمين أوفا جاله شد في الخلفية وتعامل معاه الدكتور واعتقد أن اللاعب هيتعافى منها سريعًا.
