شريف رمزي: ريهام مراتي اختارت ولادها عن الفن.. وده أهم استثمار في حياتها
أكد الفنان شريف رمزي، على إنه مع قرار زوجته الفنانة ريهام أيمن، بشأن التخلي عن الفن في سبيل تربية أولادها والتفرغ لهم، مشيرًا إلى إنه قلما ما تتجه أي فنانة لهذا القرار بسهولة.
وقال شريف رمزي خلال ندوته بـ القاهرة 24: الناس بتقولي دلوقتي حجة العيال خلصت، ليه ريهام مترجعش تمثل؟ بسي الحقيقة إن هي مشغولة بولادها، هي اللي بتصحيهم وتوديهم المدرسة والتمارين، وتطبخلهم وتأكلهم، فـ الحياة دي مش مناسباها إنها تتشغل 3 شهور مثلا في فيلم.
شريف رمزي: قرار ريهام بتربية ولادها أهم استثمار في حياتها
وتابع شريف رمزي: وريهام مش عايزة تجيب مُربية أو حد يساعدها في تربيتهم، حتى أهلنا مش مشتركين في التربية، وهي قدمت أعمال فنية كتير بتتعرض لحد دلوقتي وناجحة، بس هي اختارت، وأنا شايف إن اختيارها ده هو أهم استثمار في حياتها، شايفة إن ولادها محتاجينها أكتر الفن، وقليل لما فنانة تقدر تعمل ده.
وكان أكد شريف رمزي على إنه لم يجبر ريهام أيمن على اعتزال الفن مؤقتا، بل كان بناء على رغبتها التامة، حيث قال: ريهام طلعت بنفسها وقالت إن هي موقفة تمثيل بإرادتها عشان تتفرغ لتربية ولادها، يعني أنا لو في النيابة كان زمان الناس برأتني من تهمة إني أنا اللي موقف ريهام.
