هدى الإتربي: مخوفتش من انتقاد لبس دينا في العتاولة لأنها استخدمت أدواتها كـ ست علشان تجند الراجل
علقت الفنانة هدى الإتربي، على انتقادات ملابسها في مسلسل العتاولة، الذي عُرض ضمن السباق الرمضاني، وحقق نجاحًا كبيرًا منذ عرض أولى حلقاته.
وقالت هدى الإتربي، خلال ندوة تكريمها في القاهرة 24: مكنتش خايفة من انتقادات لبسي في العتاولة، لأن الشخصية ليها شكل ودوافع، والبنت دي بتحاول طول الوقت تحقق أهدافها بأبسط الطرق وهي انها تستخدم الرجالة، والنوع ده من البنات دايمًا طول الوقت بيبرز جماله وشكله وتستخدم أدواتها كـ ست علشان تأثر على الراجل وتجنده علشان تعمل اللي هي عايزاه.
وتابعت هدى الإتربي: ده كان الإطار والدوافع بتاع شخصية دينا، لو ترجمنا ده على شكلها لازم تبقى بتلبس لبس بشكل معين والميك آب هيكون شكله معين، فأنا مخوفتش من ده لأن القائمين على العمل عارفين هما بيعملوا إيه كويس، وكل اللي كان قالقني إن أنا أبقى مطلعة الشخصية وأبقى عند حسن ظن الناس اللي وثقت فيا وادتني شخصية زي دينا، ده كل اللي كان فارق معايا.
أبطال مسلسل العتاولة
وشارك في بطولة مسلسل العتاولة مجموعة من الفنانين منهم، أحمد السقا، طارق لطفي، باسم سمرة، مي كساب، حنان يوسف، زينة، والعمل من تأليف هشام هلال، وإخراج أحمد خالد موسى، ودارت أحداث العمل في صراع دموي بين شقيقين بسبب الطمع والغيرة، ويملأ الانتقام قلبهما، ما يتسبب في دمار كل العائلة، والزج بأحدهما في السجن.
