محمد لطفي: أنا رومانسي جدا لأني ملاكم.. وكل الرياضيين عندهم أخلاق وأسوياء نفسيا
كشف الفنان محمد لطفي أن شخصيته رومانسية في الحقيقة كونه ملاكم ورياضي، مشيرًا إلى أن جميع الرياضيين الذين يلعبون ألعاب عنيفة تكون مشاعرهم راقية وهادئين.
وقال محمد لطفي في لقائه مع القاهرة 24: كل الرياضيين اللي بيلعبوا ألعاب عنيفة وعندهم طاقة زيادة وقوة بدنية بتكون مشاعرهم راقية وهاديين وطباعهم حلوة، لأن شحنة العنف بتخلص في المكان السليم مش في الصياعة أو أي حاجة تانية، لكنها بتخلص في منظومة فيها قوانين ومستويات لذلك الواحد بيكون محافظ على نفسه وأخلاقه وبيكون شخص سوي ورزين.
وأضاف محمد لطفي: أنا ملاكم وبطل ملاكمة سابق وعندي طاقة زيادة ومجهود كبير وبعمل تمارين قوية ومجهود صعب على أي حد في سني، علشان أوصل وأكون في فريق منتخب مصر واحتفظ بقوتي محتاج مجهود كبير وبعمل تمارين صعبة وبقعد 3 أشهر في معسكرات، ولذلك ده بيخلي الواحد هادي وعنده ثقة في نفسه وبسيط وعنده مشاعر وعارف أنه قوي فبيكون بسيط وطبيعي، ولذلك كل الرياضيين واللي طيبين مشاعرهم رقيقة جدًا.
محمد لطفي يكشف كواليس بيت الرفاعي
في سياق آخر، تحدث محمد لطفي عن مشاركته في مسلسل بيت الرفاعي الذي عرض في الموسم الرمضاني 2024، وسبب اختيار اسم شخصيته سعيد الطرش في العمل.
وقال محمد لطفي: أول كام حلقة كنت أنا وأمير كرارة أعداء علشان سامية، والناس كانت مشدودة وحسيت أنهم ماكنوش عاوزين كده، وأول ما الشخصية اتحولت بدأت الناس تحب الروح دي، وتفاعلوا بسرعة مع سعيد.
وعن اسم الطرش في المسلسل قال: كان اسمه المعلم سعيد وإحنا شغالين قلت لأستاذ أحمد نارد سعيد الطرش قال لي لذيذ أوي، لأن كل حاجة عنده كتير.. طيب وجدع وغشيم وكل حاجة عنده طرش.
وعن التعاون مع رحاب الجمل قال: جميلة وموهوبة وطيبة واستمتعت بالعمل معاها وكفاية عليها علشان ما تتغرش، والمخرج أحمد بدر العمل معاه منتهى الشياكة والهدوء.
