محمد لطفي: جودة الدور هي ما تعنيني.. بغض النظر كان بطولة مطلقة أم لا
كشف الفنان محمد لطفي، عن موقفه من تقديم البطولة المطلقة، بعد تقديمه الدور الثاني لعدة سنوات، مشيرا إلى أن جودة الدور نفسه، هي فقط ما تعنيه.
وقال محمد لطفي خلال ندوته بالقاهرة 24: أنا الوحيد اللي لسة لحد دلوقتي بعمل فيلم وبينجح وبيعمل إيراد، وفي نفس الوقت أعمل دور تاني في المسلسلات وبرضه بينجح، ودلوقتي عامل بطولة مسلسل اسمه شمال إجباري 15 حلقة، وهينزل بعد رمضان، فـ أنا الشخصية وجودتها هي اللي بتبهرني وبعملها، بغض النظر عن هي بطولة مطلقة أو لا.
وسبق وأشار محمد لطفي إلى أن الممثلين مساكين، بسبب انزلاقهم داخل العديد من الشخصيات، وقال: لما بجسد شخصية مش بتكون شخصيتي الحقيقية، والناس لازم تاخد الانطباع عني من مقابلتها لشخصيتي الحقيقية، والممثلين مساكين، أحيانا بيتظلموا مع الشخصيات اللي بيقدموها.
وأضاف محمد لطفي: دايما كل شخصية بتكسر حاجة جوة الممثل، لأنه بيعمل حاجة هو نفسه مش راضي عنها بعقيدته ومبادئه وتربيته، لكن كممثل بضطر أصدقها وأتقنها وأعملها، فدي بتاخد مني كإنسان، وأحيانا كمان الجمهور بيلزق الحتت دي فيك كإنسان.
كما تطرق محمد لطفي بنفس الندوة، للحديث عن إصابته في برنامج رامز جاب من الآخر، حيث قال: توقعت الحوار هيبقى كوميدي، وكنت مستني السيفون في الكلون، بعيدا عن أن حصلي تمزق في رجلي، وقعدت 4 أيام وعملت إشاعات لكن الحمد لله ربنا ستر، ورامز جلال أخويا وعشرة عمري.
مسلسل بيت الرفاعي
وعلى جانب آخر، يذكر أن محمد لطفي شارك في موسم رمضان الماضي 2024، من خلال مسلسل بيت الرفاعي، الذي ضم عددا من الفنانين، أبرزهم أمير كرارة، ميرنا جميل، أحمد رزق، أحمد فؤاد سليم، وآخرين.
