هدى الإتربي: مكناش عارفين نخرج من المطار بعد نجاح العتاولة.. واتخضيت من اللجان الإلكترونية
تحدثت الفنانة هدى الإتربي، عن نجاح مسلسل العتاولة في الموسم الرمضاني، بجانب التعليق على الانتقادات التي طالت شخصيتها بالعمل.
وقالت هدى الإتربي، في ندوة تكريمها بالقاهرة 24: ردود الفعل على السوشيال ميديا الحمد لله وأن الجمهور مستنيني في الجزء التاني، وأنا مبسوطة من ردود الفعل من أول ما نزلنا أغنية العتاولة ومن أول مشهد لشخصية دينا، ومكنتش متوقعة أن شخصيتي في المسلسل تعمل كده مع الناس.
وتابعت: إحنا كان معظم الوقت مسافرين وإحنا بنصور فمكناش عارفين نشوف أوي التفاعل بتاع الناس في الشارع، ولكن في جزء مننا وهو راجع من المطار مكنش عارف يخرج زي أحمد السقا ومؤمن نور، التفاعل كان حلو أوي والحاجات دي مبستوعبهاش غير لما بشوفها قدامي.
وعن الانتقادات التي طالت شخصيتها بمسلسل العتاولة، فعلقت هدى الإتربي: ردود الفعل على السوشيال ميديا كانت منقسمة جدًا، في ناس كتير جدًا كانت بتحب شخصية دينا، وناس تانية كانت بتشتم وبتكره الشخصية، كل ده بالنسبة ليا تفاعل مع الدور وأنه أثر في الناس سواء حبوه أو كرهوه، وده بيبسطني جدًا.
وأضافت: في الأول كنت بتضايق وأن ليه الناس بتكتب كده، ومكنتش بعرف أتعامل مع السوشيال ميديا صح، وأنه مش شرط اللي بيشتم ده يكون بيشتمني أنا، بقيت أقول أنهم بيشتموا الدور مش أنا، واكتشفت أن في ناس بتتأجر ويتدفع لها فلوس علشان تشتم، وأنا اتخضيت من اللجان الإلكترونية.
مسلسل العتاولة
وشارك في بطولة مسلسل العتاولة مجموعة من الفنانين منهم، أحمد السقا، طارق لطفي، باسم سمرة، مي كساب، حنان يوسف، زينة، والعمل من تأليف هشام هلال، وإخراج أحمد خالد موسى.
