التحقيقات في مشاجرة 20 شخصا بالمرج: المتهمون أمطروا الضحايا بالرصاص بسبب خلاف على منزل
يواصل القاهرة 24 نشر التحقيقات في قضية مشاجرة منطقة المرج التابعة لمحافظة القاهرة، التي شارك فيها أكثر من 20 فردا، بسبب نزاع على ملكية أحد العقارات بمنطقة القلج، ما أسفر عن سقوط جثتين من طرفيها متأثرين بإصابتهما برصاصة في القدم ورصاصة في الرأس.
تفاصيل مشاجرة 20 شخصا بالمرج
وبسؤال المتهم الثاني في القضية عما هو منسوب إليه من تهم بالاشتراك بطريق التحريض مع المتهم “عبد المغني.ع.ع.ال” في قتل المجنى عليه “عبد الرحمن. ج.ع”، عمدا مع سبق الإصرار والترصد بأنه على إثر قتل الأخير وآخرين لشقيقه عقد العزم وبيت النية على قتله وأعد لذلك الغرض السلاح الناري والذخائر المبينين بمحضر ضبطه وكمن له حيث أيقن تواجده وما أن ظفر به حتى عاجلة بطلقة نارية إصابته بالوجه فأحدثت إصابته الموصوفة بمناظرة النيابة العامة وقد أودت تلك الإصابة بحياته على النحو المبين بالأوراق وقد وقعت الجريمة بناء على هذا التحريض، أجاب: محصلش.
وأضاف المتهم الثاني في أقواله أمام جهات التحقيق: اللي حصل أن يوم الخميس حوالي الساعة 9:00 بالليل فوجئت بتليفون جالي من رقم غريب رديت فلقيت واحد بيقولي أنا محمود زبلح، فـ قلتله عايز ايه فقالي أنت محمد عبد المغني، قلتله أيوا، راح قاللي البيت اللي أنت شاريه في محمد نجيب البيت دا اعمل حسابك يفضى على يوم الخميس الجاي زي النهاردة، فـ قلتله أنا عايز افهم ايه الكلام دا تعالي عرفني بنفسك أو أجيلك، فقالي تعالالي عند الصرف في المرج عند القهوة بتاعتكم.
وتابع المتهم الثاني في أقواله أمام جهات التحقيق: أنا روحت مع واحد يعرف المنطقة هناك وروحت قابلت محمود زبلح وأخوه عبده زبلح وإيكا وواحد تاني بعين واحدة اسمه سيد الأسود وواحد صغير اسمه يوسف وقعدت معاهم وقلتلهم ايه الحكاية، فقالولي البيت اللي أنت شاريه اتنصب عليك فيه ويعوض عليك ربنا وتفضي لنا البيت قلتلهم الكلام دا مش صح دا شغل بلطجة وشوفوا حد كبير اتكلم معاه فقالولي لو البيت مفضيش على يوم الخميس زي النهاردة أحنا هنفضيه بطريقتنا ونضرب الناس اللي فيه وأخدت بعضي ومشيت وروحت قدام البيت عندنا في الشارع الجديد.
وأضاف: كان موجود هناك أخويا الله يرحمه علاء الدين وأخواتي الباقيين اللي قاعدين في نفس البيت معايا وكنا قاعدين علشان السحور وبعدين فوجئنا أن بعد ما دخلنا صلينا الفجر بحوالي سبع دقائق أن في ضرب نار وأنا مكونتش متخيل أن دا يحصل وكان نفس الناس اللي قعدت معاهم، كان معاهم أسلحة نارية وبعدين اللي ضرب أخويا بالنار عبده زبلح، وبعدين هربوا وجيت روحت القسم أعمل المحضر فقالولي أروح المستشفى فـ روحت المستشفى وعملت الإسعافات ورجعت علشان أعمل المحضر فـ قعدت في القسم شوية وفضلوا ركنني لحد حوالي الساعة 2 أو 3 العصر.
وتابع: ساعتها فوجئت بابن أخويا ماسكينه وداخلين بيه القسم فقلتلهم دا جاي ليه أحنا مجني عليه، فقالولي أصل أحنا مسكناه بمطواه وبعدين فضلت قاعد لحد ما قابلت ابن أخويا في القسم فسألته أنت جاي ليه، فقال لي علشان أنا ضربت اللي ضرب أبويا بالنار ومن ساعتها وأنا في القسم وودوني امبارح نيابة المرج والنهاردة جابوني على هنا ودا كل اللي حصل.
