شقيقة ضحية مشاجرة المرج في التحقيقات: المتهم قتل أخويا وقالنا موتّهلكم
يواصل القاهرة 24 نشر نص التحقيقات في مشاجرة منطقة المرج التي شارك فيها أكثر من 20 فردا، بسبب نزاع على ملكية أحد العقارات بمنطقة القلج، ما أسفر عن سقوط جثتين من طرفيها متأثرين بإصابتهما برصاصة في القدم ورصاصة في الرأس.
تفاصيل مشاجرة المرج
واستمعت جهات التحقيق لشهادة مجري التحريات في الواقعة، وجاءت أقوال شقيقة المجني عليه كالآتي: اللي حصل أن سابع يوم رمضان وكان يوم الجمعة الفجر كنت أنا وأمي وبنت خالي وأخويا الصغير عند بيت أخويا عبد الرحمن علشان نتسحر عندهم وكنا نازلين نصلي الفجر وبعدين لقينا ناس كتير في وشنا أمناء وضباط وبيسألونا أنتم ساكنين هنا فـ قلنلهم آه وبعدين خدونا معاهم في عربية ميكروباص معرفش بياناتها.
وأضافت شقيقة المجني عليه في التحقيقات: فضلوا يلفوا بينا كتير أوي لحد الساعة 8:00 الصبح لحد ما وقفونا عند بيت ناس طرف في خناقة أخويا ملوش أي علاقة بيها واتصلوا بأخويا ساعتها وقالوا له أنتا معاهم وطلبوا منه ييجي فـ أخويا جيه هو وواحد اسمه ناصف، ودا سبب المشكلة اللي حصلت عند بيت الناس دي، وأخويا جاب ناصف علشان أخويا مكنش له أي علاقة بالمشكلة اللي حصلت وبعدين لما أخويا جه ركبوه عربية تانية كانت معاهم هو وناصف وشوية ونزلوه وجابوه العربية بتاعتنا وقعدوه جنب الشباك وفضلوا واقفين بيه كتير أوي عند البيت اللي حصلت فيه المشكلة.
وأضافت شقيقة المجني عليه في التحقيقات: بعدين كان أخويا ساعتها بيكلمنا وبيعتذر لنا على اللي حصل وبيقول لنا إنه ملوش دعوة بالمشكلة وكان العربية قاعد فيها اثنين ضباط قدام وأمين شرطة اسمه علي وبعدين كان من ساعة ما أخويا جيه شوفت واحد اسمه نور ووالده اسمه محمد عبد المغنى واقفين عند البيت ومكانوش بيعملوا أي حاجة وكانوا شايفين كل حاجة بتحصل وفضلوا واقفين لحد ما أخويا اتقتل وكان ساعتها فيه حوالين مننا أمناء وضباط شرطة كثير جدا وبعدين أثناء صلاة الجمعة لقيت مكنة جاي عليها واحد اسمه أدهم وسايق المكنة عمه واسمه رضا وعدوا من جنب شباك أخويا اللي كان ناحية الشارع.
وأردفت شقيقة المجني عليه: كان ساعتها في العربية ظابط نايم وواحد تاني قاعدين قدام وقاعد في أول صف أمين شرطة معرفش اسمه، وبعد ما المكنة عدت مفيش بأقل من خمس دقائق سمعت صوت أول مرة أسمعه ولقيت أخويا وقع وشوفت طرف مسدس في إيد اللي اسمه أدهم وكان واقف جنب شباك أخويا بالظبط، وكان فيه دخان طالع من ناحيته وبصيت ورايا لقيت ناس بتجري علينا وضباط كتير جدا حوالينا وأنا فضلت أصوت أنا وكل اللي في العربية وحاولنا ننزل منها بس الأمين اللي كان قاعد قدام فضل يمنعنا ننزل واللي ضرب أخويا لف ناحية باب العربية وقال لنا هو مات؟ موته لكم.
واستكملت شقيقة المجني عليه أمام جهات التحقيق: ساعتها لقيتهم مسكوه وكان أعمامه بتحاول تهربه وبعدين طلعوا بينا على المستشفى واحنا كل دا بنصوت والأمناء فضلت تقول لنا نبطل علشان عاملين إزعاج للناس وكان فيه ساعتها فيديو اتصور للموضوع بعد ما حصل على طول ودا كل اللي أعرفه.
