نادية شكري: قلقت لما بقيت تريند بعد جودر وكنت خايفة من الحسد.. وبشرتي تعبت بسبب مكياج الشخصية
تحدثت الفنانة نادية شكري عن الصعوبات التي واجهتها خلال تصوير دورها في مسلسل جودر بطولة الفنان ياسر جلال والذي عرض في الموسم الرمضاني 2024.
قلقت لما بقيت تريند بعد جودر
وقالت نادية شكري: وضع المكياج كان بياخد حوالي تلات أو أربع ساعات، وبنحط سيلكون على الوش وكحول وسشوار وبيكون فيه دقة شديدة، وبشيل الحاجات دي في ساعة وشوية، والشعر كنا بنركب صلعة ويتلزق عليها الشعر الأبيض بكولة وكان يدخل في مناخيري وبتخنق وبشرتي كانت بتتعب، وجربت كذا شخصية شاف كذا حد ولما عملت تيست قالهم زودود كمان.
وأشارت نادية شكري إلى أن التحدي بالنسبة لها كان عودتها للتمثيل، مضيفة: ربنا استجاب لي وطبطب عليا في المسلسل ده لأني كنت فقدت الأمل إني اشتغل في رمضان وكنت قاعدة زعلانة ومحبطة.
قلقت لما بقيت تريند
وعن تخوفها من الحسد بعد النجاح الكبير الذي حققته في المسلسل قالت: مفيش حد مش بيخاف من الحسد، والحسد موجود ومؤمنين به، لكن الواحد بيتوكل على الله، ولما بقيت تريند قلقت وما عملتش حاجة غير أني بصلي لربنا وادعي له يبعد عني أي حاجة وحشة.
نادية شكري تكشف سبب سفرها للخارج
على جانب آخر، تحدث نادية شكري عن سبب سفرها بالخارج إلى أستراليا في بداية مشوراها رغم تألقها، قائلة: أخويا كان عايش هناك وبيتحايل عليا أروح له وروحت على أساس فسحة وعجبتني الحكاية وكملت، مع إني رايحة زيارة ولكن لقيت نفسي في حياة تانية مختلفة.. وأنا من النوع اللي كرامتي بتاكلني على أي حاجة لكن بره ما حستش الأحاسيس دي، أو أن فيه حاجة ممكن تضايقني وأخويا كان محتاجني.
وأضافت نادية شكري: كنت متجوزة وانفصلت عن سامي العدل، وكان معايا بنتي رشا خدها ومحستش بالغربة خاصة أني كنت مع أخويا وكان فيه مصريين كتير وفنانين بييجيوا يعملوا حفلات.
وأكملت: لما رجعت مصر تعبت أوي ومكنتش عاوزة أرجع الوسط وكنت حاسة إني فيه تغيرات ومش عارفة أتأقلم وده كان بيخليني أمد رجل وأرجع تاني وأول واحد رجعني إبراهيم الشقنقيري وقال لي هترجعي.
