ربطوه في عمود وعذبوه.. أسرة إسلام تروي كواليس اختطافه بمنطقة ناهيا|فيديو
شهدت منطقة ناهيا التابعة لمحافظة الجيزة، جريمة قتل بشعة، حيث لقى شاب ثلاثيني مصرعه على يد عدد من الأشخاص بعد وصلة تعذيب، وتم نقل الجثة إلى مشرحة زينهم تحت تصرف الجهات المعنية.
تفاصيل مصرع شاب بعد وصلة تعذيب بمنطقة ناهيا
والتقى القاهرة 24 بأسرة المجني عليه الذي يدعى إسلام، وقال والد الضحية: إسلام كان سهران عند حد من قرايبنا يوم الخميس بالليل، وبعدين وهو مروح عدى على مشاية جنب مزرعة فالخفير فكره حرامي، فنادى على خفير تاني بصوت عالي قاله إلحق حرامي وبعدين مسكوه.
وأضاف والد المجني عليه: المتهمين مسكوه وتعدوا عليه بالضرب وبعدين ربطوه في العمود وبعد شوية سابوه يمشي، ابني رجع البيت عليه آثار تعذيب سألته مالك، قال أنا اتضربت وهروح أخد حقي.
واستكمل: تاني يوم الظهر بسأل على ابني قالولي إنه رايح مشوار، فـ أنا روحت صليت الظهر ورجعت نمت شوية، وبعدين جه عمي سألني فين إسلام قولت هتلاقيه راح يعمل شغل وهيرجع.
وأردف: بعدين ابني مرجعش وكان وقتها راح المزرعة وفي 4 أشخاص اتكاتروا عليه ومسكوه ربطوه في العمود وبلغوا صاحب المزرعة، وبعدين جه بالعربية وقالهم حطوه في شنطة العربية، وأخده ومشي ومحدش يعرف هو راح بيه فين، ابني قعد متغيب عن البيت لمدة 4 أيام.
جثة وآثار تعذيب
ومن جانبها، قالت والدة المجني عليه: حررنا محضر تغيب ابني إسلام 27 عاما، وبعد كده لقينا حد بيتواصل معانا وبيقول إن إسلام مات وجثة في المشرحة، وكان في آثار تعذيب في كل جسمه، وفسرت أن سبب الواقعة هو اتهام خفير المزرعة له بالسرقة.
واختتمت الأم حديثها لـ القاهرة 24: إحنا بنطالب بالقصاص العادل وإحنا واثقين في بلدنا وحكومتها والقضاء.
تفاصيل مصرع إسلام
كانت البداية بتلقي غرفة عمليات النجدة بمحافظة الجيزة، محضر من أحد الأشخاص بتغيب نجله عن المنزل لمدة 4 أيام، وعلى الفور قامت الأجهزة الأمنية بفحص البلاغ.
بالانتقال والفحص تبين مصرع شاب يدعى إسلام، 27 عاما، مقيم بمنطقة ناهيا، على يد عدد من الأشخاص بعد وصلة ضرب وتعذيب، وعلى الفور كثفت الأجهزة الأمنية من جهودها وتمكنت من ضبط الجناة، ويجري التحقيق معهم للوقوف على تفاصيل الواقعة وملابساتها.
تحرر محضر بالواقعة وتولت الجهات المختصة التحقيق.
