دينا فؤاد: اتهاجمت على دوري في الاختيار.. وتكريم الرئيس لحظة فارقة في حياتي
تحدثت الفنانة دينا فؤاد، عن مشاركتها في مسلسل الاختيار، معربة عن سعادتها الكبيرة بتكريمها من الرئيس عبد الفتاح السيسي.
وقالت دينا فؤاد في تصريحات تليفزيونية: عملت دوري في مسلسل الاختيار من قلبي، ودكتور بيتر ميمي جالي من أول مشهد وقالي لازم الناس تعرف الحقيقة والدور مش هينفع يتعمل غير كده إحنا بنوثق الحقيقة، وأنا كنت بجد مغلولة من جوايا من الأحداث اللي بتحصل من خراب ومحدش كان قابل بيه، وأنا اتهاجمت بشكل غير طبيعي وأنا كنت مؤمنة باللي بعمله ومفرقش معايا خالص لأني كشفت الحقيقة.
وعن تكريمها من الرئيس عبد الفتاح السيسي، فعلقت دينا فؤاد: والدور ده من أقرب الأدوار لقلبي لأنه خلاني عيشت لحظة من أحلى لحظات حياتي وهو تكريم الرئيس والقوات المسلحة، وكانت لحظة فارقة في حياتي، وقولت في فنانات كتير جدًا ممكن يقضوا طول حياتهم وميحظوش باللحظة دي، والعالم كله شاف الاختيار ونجح على مستوى العالم كله.
دينا فؤاد: بدأت مذيعة سياسية.. ونور الشريف صاحب الفضل
أما عن بدايتها الفنية، فقالت دينا فؤاد: أنا كنت بحب التمثيل من وأنا صغيرة، وأبويا كان رافض ده وشايف أن التمثيل ده عالم مش بتاعنا، واشتغلت مذيعة في برنامج سياسي اجتماعي بيرصد إيجابيات وسلبيات الشارع المصري، ومسيبناش محافظة من محافظات مصر مروحناش فيها.
وواصلت: لما اتجوزت أبو بنتي ووافق أني أمثل، وأستاذ نور الشريف كان بيشوفني وأنا مذيعة، وشافني على الحقيقة وده كان حلم، وقالي ليه اختارتك تشتغلي معايا أنتي بالذات؟ قولتله لأن حضرتك أكتر حد بيتبنى وجوه جديدة وبتنجح معاك، وشاركت معاه في مسلسل الدالي، وهو صاحب الفضل عليا.
وأضافت: فيلم حلم العمر رغم أني كنت لسة مش بالنضح الفني الكافي، ولكن الناس بتوقفني لغاية دلوقتي وتقولي عايزينك تعملي لينا فيلم زي حلم العمر، والأستاذ وائل إحسان كان متنبأ ليا بالنجاح، وبعدها خدت فرص كتير زي مسلسل العار، وفيلم واصل ونواصل مع النجم كريم عبد العزيز، اللي أنا لغاية دلوقتي مش مصدقاها.
