ميار الببلاوي تعاتب بسمة وهبة بعد أزمة العرافة واتهامها بالخطيئة: عملتلك إيه عشان الهجوم دا كله؟
ردت الفنانة المعتزلة والإعلامية ميار الببلاوي على حديث الإعلامية بسمة وهبة بعد تعليق الأخيرة على اتهام الشيخ محمد أبو بكر لميار بالزنا بعد حلقتها في برنامج العرافة.
وأكدت ميار الببلاوي أن الأزمة أصبحت في يد القضاء، مشيرة إلى أنها اتخذت الإجراءات القانونية ضد الشيخ لخوضه في عرضها، مضيفة: رافضة الناس يقولوا إني بركب التريند، وكنت ساكتة طول الفترة اللي فاتت والناس كانت تبهدل فيا وتقطع فيا والموضوع أصبح في إيد القضاء والقانون.
ميار الببلاوي تشكر بسمة وهبة
وقالت ميار الببلاوي موجهة رسالة إلى بسمة وهبة عبر القاهرة 24 حيث وجهت لها الشكر على جزء من حديثها في الفيديو وعاتبتها على جزء آخر: لقيت الفيديو الخاص ببسمة وبشكرها جدًا أنها طلعت، أولا هو فيديو جميل من أول إنها بتعاتب ابني وقالت له إن مامتك مالهاش غيرك، وشكرا إنك عارفة ابني يبقى إيه بالنسبة لي.
وأوضحت ميار الببلاوي أنه وقت تصوير حلقتها في برنامج العرافة مع بسمة وهبة، كانت تصطحب معها نجلها ولكن رفضوا أن يحضر معها، قائلة: لما قلت لك باب الاستديو اتقفل قلت لك محمد بره وهيضايق وأنا مش متعودة أسجل وهو مش موجود، وزعل مني أكتر لأنه كان فاكر إني أنا اللي خليته ما يدخلش وهي قالت لي ما تقلقيش.
وأضافت ميار الببلاوي: كمان بشكر بسمة لأنها قالت للشيخ أنت اتهتمها بكذا على الرغم من إنها نفت وجود المحلل علشان ترجع لزوجها، ودافعت عني.
ميار الببلاوي مستاءة من بسمة وهبة
بينما أعربت ميار الببلاوي عن استيائها من بسمة في جانب آخر من حديثها عنها في الفيديو قائلة: أنا عملت لك إيه يا بسمة ليه الهجوم ده، الناس كلها من أول ما الموضوع حصل سايبين كل حاجة والتجريح اللي حصل لي من الشيخ، وقالوا لي أنتي غلطانة إنك طلعتي برنامج بسمة بتاع الفضايح، وأنا في رمضان زرار التليفزيون مش بيتفتح وعمري ما شفت برنامج العرافة في حياتي لكني عارفة أن فيه برنامج اسمه العرافة وبياخد مشاهدات كويسة وعارفة بسمة من أيام ما كنا محجبات.
وأضافت ميار الببلاوي: أنا بحب بسمة وفرحت جدا لما عرفت إني هطلع معاها، لكن الناس بتقول انتي إزاي تروحي برنامج فضائح، وإنتي اللي فتحتي على نفسك الكلام في حياتك الشخصية، وأنا قلت لها في البرنامج حياتي الشخصية مش عاوزة أتكلم فيها لكن هي اتعصبت وقالت اللي يقعد على الترابيزة دي مفيش حاجة اسمها شخصية، وقتها فقدت تركيزي بسبب الطريقة الهجومية وخلتني مصدومة خاصة أنها أول ما شافتني رحبت بيا وقابلتني كويس وقالت لي حبيبتي وميرو لكن أول ما البرنامج بدأ لبست شخصية تانية.
ميار الببلاوي تكشف سبب صمتها بعد حلقة العرافة
وأكملت ميار الببلاوي كاشفة سبب سكوتها بعد الحلقة قائلة: بسمة بتقولي ليه سكتي لما الحلقة نزلت من ساعة البرنامج، وكنتي فين وما اتكلمتيش ليه، أنا ما رضتش أفتح بوقي واتقال اتجوزت 11 مرة وبتتجوز بشحن الرصيد، وقلت أسيبهم ياكلوا عيش وحسنات جيالي وأميتوا الباطل بالسكوت عنه، لكن ما كانش يصح تقولي عليا كده وأول ما تكلمتي قلتي فيه ناس حلقتهم بتعمل تريند يقولوا هل من مزيد ويبكذبوا وييحطوا لنفسهم فضايح لكن أنا مفتحتش بوقي اول ما نزلت الحلقة ولو عاوزة اعمل تريند كنت اتكلمت وقتها.
وأردفت ميار الببلاوي: الحلقة مدتها ساعة ولكن إحنا مصورين ساعتين على أساس هيكون فيه مونتاج وفيه حاجات اتسألت فيها وقلت لها شيلي وقالت لي حاضر عنيا، وأنا كنت وصلت لمرحلة إني عاوزة أخرج أقولهم أني مش عاوزة أذيع الحلقة ولحد آخر الحلقة وأنا مستفزة ومش حابة طريقة يا حاج ويا شيخة.
ميار الببلاوي تعاتب بسمة وهبة
وواصلت: ليه يا بسمة أنا بعزك وأنتي أختي وكنت فرحانة إني هشوفك لأن من زمان أوي في أول حجابنا كان عندنا ندوة في مجلة في وسط البلد أو المهندسين، وهي كانت بتعمل برنامج قبل أن تحاسبوا وكانت مكسرة الدنيا، وأنا روحت كنت محجبة جديدة وجايبينا إحنا الاتنين وادوها هي الميكرفون وأنا ساكتة لقيتها قالت خدي الميكرفون وقالت لي أتكلم إزاي وحسيت أنها شخصية حنينة ولذيذة، وقلت ليها عندي جميلة لأننا صعايدة مش قلالة الأصل لازم، والناس قالوا لي لازم ترفعي قضية عليها قلت لهم هي مالها هي ما ضربتنيش على إيدي لكن ده ما يمنعش إني ندمانة اني روحت البرنامج.
واستكملت: بسمة هجومية ومستفزة ومش بتدي فرصة أجاوب وخلتني فقدت تركيزي ولسه كنت هقول وأوضح قالت ما تحكيش قصص ولسه بشرح وبقولها هفهمك قالت متحكيش قصص، قلت لها أنا مجبتش محلل وعادي ممكن حد يطلق تلات مرات ويتجوز حد تاني، ولقيت في حجر عليا، وبتقولي إحنا ما ركبناش صوت على صوتك، لكن أنتي يا بسمة مقعدتيش على الشاشة قد ما أنا قعدت إنتي اه إعلامية كبيرة بس مقعدتيش على الشاشة قدي أنا بقالي 22 سنة مذيعة بطلع يوميًا، أنتي بتختفي فترات وترجعي، ويمكن لأني بقدم برنامج ديني مالوش باع في الفضايح ولا يعمل تريندات وأنا مش قليلة ومعروف أنا مين، وأجوكي ما تتكلميش عني تاني.
