عمر كمال: بطلت أظهر مع رقاصات في كليباتي.. ومحمد فؤاد نسي يعزمني على فرح ابنه
كشف مطرب المهرجانات عمر كمال، عن سببه حرصه على عدم الظهور مع راقصات في كليباته الغنائية، مؤكدًا أنه أصبح يتجنب وجود الراقصات في كليبات أغانيه احترامًا لرغبة والدته، بجانب الحديث عن عمله في الملاهي الليلة.
وقال عمر كمال، خلال لقائه مع الإعلامية أميرة بدر، في برنامجها خلاصة الكلام، المذاع عبر شاشة قناة النهار: بتجنب وجود الرقاصات في كليباتي، علشان مزعلش أمي لأنها بتقعد تقولي اتقي ربنا وفي أطفال بتتفرج عليك، وهي بتزعل جدًا لو لقت واحدة بترقص جنبي، وهي مبتقولش إن فلوسي حرام لأنها من الأغاني، وأول حاجة ربنا هيحاسبني عليها أنا أذيت مين، وإيه الحرام اللي أنا عملته في إني فرحت ناس؟.
وأضاف عمر كمال: أنا لسه بشتغل في ملاهي ليلية، ومبتضايقش لو حد رمى فلوس، دي لغة التحية هناك وهما بيجيبوا عمر كمال علشان يجيبوا فلوس أكتر، وأي حد بيشتغل في ملهى ليلي بيترمي عليه فلوس، ولو أنا بشتغل نمرة ثابتة بنتفق الفلوس دي هتتقسم إزاي، ومش كل الناس اللي جاية عارفة أن دي فلوس بتتأجر علشان يتعمل بيها شو، وفي ناس بترمي فلوس ودولارات بجد، وهبطل أروح ملهى ليلي لما أكون عليت سعري أو نجحت كمان شوية.
عمر كمال يتحدث عن محمد فؤاد وسبب عدم حضور زفاف ابنه
على جانب آخر، تحدث عمر كمال، عن علاقته بالفنان محمد فؤاد، مؤكدًا أنه لا يعلم سبب عدم دعوته لزفاف نجل محمد فؤاد، والذي حضره عدد كبير من نجوم الفن.
وقال عمر كمال: أنا بحب محمد فؤاد جدًا من جوا ومن برا، أنا معرفش بيحبني ولا لأ ولكن بشوفه بيدافع عني، وهو أستاذي وحبيبي ومقللش مني في مرة وبحترم فيه الجزء ده، هو مساندنيش ولا وقف جنبي ولا قال ده، وأنا طبعًا اتشرفت أنه غنى معايا وعلاقته بيه طيبة جدًا.
وعن سبب عدم دعوته لحضور حفل زفاف نجل محمد فؤاد، قال: ممكن يكون نسي أنه يعزمني، ومش زعلان ومش هبقى متطفل على الناس، الراجل نسي، وفي حبايبه جدًا مراحوش الفرح، وممكن هما ميكونوش عايزين اللون الشعبي والمهرجانات في الفرح.
