زينة: باسم سمرة اشترط على الإنتاج يجيبوله ورد يوميا خلال تصوير العتاولة
تحدثت الفانة زينة عن كواليس جمعتها بالفنان باسم سمرة خلال تصوير مسلسل العتاولة الذي عرض في الموسم الرمضاني 2024، كاشفة عن علاقة غريبة لباسم سمرة مع الورد وحبه الشديد له لدرجة اشتراطه على الإنتاج أن يحضروا له وردًا يوميًا.
وقالت زينة: باسم سمرة عايش بالورد، هو كاتب في العقد شرط وهو إن كل يوم الإنتاج لازم يجيبله بوكيه ورد، ده شرط غريب جدًا عمري ما شفت ممثل بيعمل كده.
وأضافت زينة: ده راجل لذيذ أوي وبعدين لما أنا وهو بقينا أصحاب أوي، بقى كل يوم يجيب لي ورد عشان عارف إن أنا بحب الورد، وأنا الصراحة عمري ما حد جابلي ورد، وهو دخلي من نقطة ضعفي.
زينة: باسم سمرة راجل لذيذ أوي
وتابعت زينة: كل يوم يجيبلي الورد ويجي يقول لي بُخيه بالمياه زي المكواجية عشان الورد يحبك، فاكتشفت إن باسم سمرة عنده علاقة مع الورد مع إنه ميبانش عليه خالص، ده شكله مش بتاع ورد خالص ولا رومانسي خالص وكل ما يشوفني يقولي (عمو سامي).
وكشفت زينة كواليس تقليدها وهي وباسم سمرة فيديو عمو سامي الذي انتشر بشكل كبير على التيك توك قائلة: باسم سمرة كل ما يشوفني يقولي عمو سامي، وأنا ماليش في التيك توك أوي ولكن فتحت التيك توك مخصوص بسبب الموضوع ده، وفيه مرة علي حسن المنتج الفني للمسلسل خدنا يوم نفطر بره وقال لي شوفيه دلوقتي ولما شفته ضحكت قال لي تعمليه وفعلا عملته مع باسم لقيته قلب الدنيا، استغربت وقلت إزاي ده أنتم مش مشيرين مشاهد المسلسل كده، وقعدنا نضحك وقال لي لما أقول لك على حاجة تسمعي الكلام.
