شريفة ماهر: حجيت 6 مرات علشان ظهرت ببيكيني في بدايتي.. وبلطم على وشي من مسلسلات رمضان
كشفت الفنانة شريفة ماهر، رأيها في الأعمال الفنية التي تعرض على الشاشة مؤخرًا، وعلاقتها بنجلها الذي لم يسأل عنها.
وقالت شريفة ماهر لـ القاهرة 24: في رمضان كنت بلطم على وشي وأنا صايمة من اللي بشوفه بيتعرض والفضايح وكنت عاوزة أكسر التليفزيون.
شريفة ماهر: فين المخرج والرقابة؟
وأضافت شريفة ماهر متسائلة: فين المخرج والرقابة؟.. إحنا على أيامنا مكانش فيه الألفاظ والعري ده.. أنا متحسرة على اللي بشوفه، لأن فيه فضايح بتطلع ووقاحة ودعارة على الشاشة وبلطجة عكس زمان، وألفاظ لا تصح يعني كلمة ابن الكلب لو كانت في فيلم زمان كان يترمي.
واستكملت شريفة ماهر: إحنا على أيامنا مكانش فيه العري ده، وأنا أول ما طلعت ظهرت بـ بكيني وحجيت 6 مرات علشان ربنا يغفر لي وفاضل لي الحجة السبعة، واتعرض عليا دور جريء في لبنان رفضت أقدمه، وأنا ست متدينة وبصلي الفجر وكل وقت ويا رب يحسن خاتمتنا.
وواصلت شريفة ماهر: مش بالعري.. أنا بشوف المذيعات والفنانت بيطلعوا عريانات، ومحدش بياخد حاجة معاه في التربة وإحنا كلنا ميتين على الدنيا لكن محدش هيخلد ولا هيعمر، والواحد لازم يعمل حساب ربه.
واستكملت: والله العظيم أنا عمري ما شربت ولا خمرة ولا سيجارة في حياتي مع أني اتجوزت وزير وكان بيشرب في المناسبات، لكني لما كنت أشمها أرجع ومرة كنت مع فنانة في فيلم وهي بتشرب خمرة ولما بقيت أشم ريحتها أجري أرجّع، ودعيت ليها ربنا يهديها، وربنا أعظم من أي حاجة وهو الرزاق والكريم والمفروض نخاف منه ونعمل له حساب.
شريفة ماهر: ابني محاولش يكلمني وقلبه زي الحجر
على جانب آخر، كشفت الفنانة شريفة ماهر تطورات أزمتها مع نجلها قائلة: لسه مبكلمش ابني، وهو ما حاولش يكلمني قلبه زي الحجر، وكل الناس مستغربة إزاي كدة.. منه لله وبقول يا رب وحسبي الله ونعم الوكيل، ومن كتر ما عمل فيا حاجات وحشة ما بقاش يوحشني وربنا مش حاوجني ليه وأنا مش مسماحاه ولو أنا سامحته ربنا مش هياسمحه.
