من حفل بالمعادي للكلابش.. القصة الكاملة لدهس عصام صاصا أحد المواطنين على الدائري
رحّلت الأجهزة الأمنية بمديرية أمن الجيزة مطرب المهرجانات عصام صاصا لقسم شرطة الطالبية بعد الانتهاء من التحقيق معه، إذ أصدرت جهات التحقيق في الطالبية، قرارا بعرض مؤدي المهرجانات الشعبية، غدًا الثلاثاء 7 مايو 2024، على الطب الشرعي من أجل إجراء تحليل مخدرات له.
القبض على مؤدي المهرجانات عصام صاصا
وكانت مديرية أمن الجيزة، تلقت بلاغا من مستشفى الهرم بوصول جثة هامدة لشخص جراء حادث تصادم أعلى الطريق الدائري، وعلى الفور تم اتخاذ الإجراءات اللازمة.
وبالانتقال والفحص تبين مصرع شخص نتيجة تعرضه لحادث تصادم سيارة ملاكي، وجرى نقل الجثة إلى مشرحة المستشفى وتحرر محضر بالواقعة وتولت النيابة العامة التحقيق، ومن جانبها ألقت الأجهزة الأمنية القبض على مطرب المهرجانات الشعبية عصام صاصا، بتهمة دهس شخص أعلى دائري المنيب.
التحقيق مع مطرب المهرجانات عصام صاصا
وكشفت التحقيقات مع مطرب المهرجانات الشعبية عصام صاصا، بعد دهسه شخصا أعلى دائري المنيب، أن المجني عليه شخص يدعى أحمد مفتاح يبلغ من العمر 40 عاما، وأن الحادث وقع خلال عودته من حفله على طريق الدائري قبل نزلة المريوطية على طريق المنيب.
كما فرغ رجال المباحث كاميرات المراقبة وأعدوا تقريرا كاملا بشأن الحادث للوقوف على ملابسات الواقعة، وانتداب مهندس من الإدارة العامة للمرور بالجيزة لفحص سيارته، وإجراء تحليل مخدرات لـ مطرب المهرجانات عصام صاصا.
أقوال مطرب المهرجانات عصام صاصا أمام جهات التحقيقات
وحصل القاهرة 24 على التحقيقات في قضية عصام طه طلعت مهني، وشهرته عصام صاصا، ويعمل: طالب، مقیم بحدائق الأهرام، فيما جاء استجوابه على النحو التالي: اللي حصل أنا كنت راجع من الشغل وأمام بنزينة توتال اتجاه السياحي قبل المريوطية، فوجئت بشخص يعبر الطريق الدائري فجأة، وحاولت أتفاداه ولكن معرفتش، وهو ده اللي حصل، والكلام ده حصل النهاردة أعلى دائري المنيب دائرة القسم، وقتها معرفتش أتفاداه لأنني فوجئت به مرة واحدة أمامي، وأنا كنت على سرعة 70 تقريبا.
شقيق ضحية حادث مطرب المهرجانات عصام صاصا
والتقي القاهرة 24 بأسرة المجني عليه، واستهل شقيق المجني عليه حديثة قائلا إن الدم كان يملأ ملابس وجسد شقيقه بالكامل، موضحا: أخويا هدومه كانت مليانة دم ولما رحت أبص لقيت رأسه عكس اتجاه جسمه وحاجة تقطع القلب محدش يقدر يتخيلها، وأخويا كان بيجري على أكل عيشه.
وأضاف محمد مفتاح، شقيق المجني عليه، أن شقيقه كان يمر أعلى الطريق الدائري لاستقلال أتوبيس الشركة للتوجه إلى عمله، وفوجئ بمطرب المهرجانات عصام صاصا يدهسه.
وتابع: أخويا عنده 4 أولاد منهم 2 أطفال في مرحلة التعليم، و2 بنات على وش جواز، ومحدش تواصل معانا من أسرة عصام صاصا ولا حد جه، وأنا من المعجبين بعصام صاصا وبسمع أغانيه كلها، وأخويا عمره ما زعل حد وهو أطيب واحد في أخواتي، والقرية بالكامل زعلانة عليه وفي انتظار استخراج تصريح الدفن.
والدة ضحية حادث عصام صاصا
بينما قالت والدة أحمد عبد الفتاح، ضحية دهس سيارة عصام صاصا، إن ابنها كان يسعى من أجل لقمة العيش، وأضافت: ابني طلع على لقمة عيشه الصبح، معاه 4 أولاد والمتهم خبطه بالعربية موّته، ولازم ناخد حقه وإحنا مش هنتنازل عن حقه.
وأضافت والدة المجني عليه باكية: مقدرتش أدخل المشرحة أشوف الجثة، بعد ما قالولي ابنك في المشرحة وقعت من طولي ومقدرتش أدخل أشوفه، وكان نفسي أشوفه، الناس بلغوني الصبح إن ابني مات في حادث على الطريق، وأهل عصام صاصا كانوا معايا الصبح، وأنا معرفهومش وجابوني لحد المستشفى وقعدوا يهدوا فيا ويشربوني ميّة، بس مقالوليش إن ابنهم اللي صدم ابني.
وتابعت والدة المجني عليه: معرفش هو كان ماشي إزاي؟ شارب ولا مسطول عشان يمشي يدوس ويموت الناس على الطريق، لازم يسوق بالراحة لأن أرواح الناس مش لعبة في إيديهم، ابني طلع على لقمة عيشه وعنده أولاده بيجري عليهم، كان طالع يجري على شغله وكان بيعدي الطريق عشان يروح شغله.
وذكرت: هو عشان مطرب يمشي يدوس ويموت في الناس ومحدش يسأله أنت بتعمل إيه، ابني كان طالع على أكل عيشه، مش عارفين أولاده هياكلوا منين بعد وفاته، وإحنا عايزين حق أولاده اللي كان طالع عشان يجيب لقمة عيش عشانهم.
وأردفت والدة المجني عليه: آخر مرة شوفته فيها من أسبوع، لأني قاعدة في مصر وهو قاعد في البلد بيروح وييجي كل يوم، وهو كلمني الصبح قالي أنا جاي من البلد، عشان كان نزل يحضر كتب كتاب حد من قرايبه.
التحفظ على سيارة مطرب المهرجانات الشعبي عصام صاصا
ومن جانبها قررت جهات التحقيق بالطالبية عرض مطرب المهرجانات عصام صاصا، على الطب الشرعي صباح باكر لكشف مدى تعاطيه المواد المخدرة، وحجز سيارته ماركة شيفروليه كامارو بجراح السيارات الخاص بالقسم، تحت تصرف النيابة العامة.
