خالد منتصر عن تحريم تمثال العامري فاروق: المزاج السلفي وصل لحد المهزلة والكوميديا السوداء
هاجم الكاتب الدكتور خالد منتصر، تعليق أحد الإعلاميين بشأن تحريم وضع تمثال للعامري فاروق نائب رئيس الأهلي الراحل، داخل مقر القلعة الحمراء بالجزيرة.
تعليق خالد منتصر على تحريم تمثال العامري فاروق
كتب خالد منتصر عبر حسابه الشخصي على فيسبوك: المزاج السلفي في مصر وصل لحد المهزلة والكوميديا السوداء، إعلامي محترم فاضل ومع كل الإجلال والاحترام لشخصه، بيقول إن وضع تمثال العامري فاروق في النادي الأهلي حرام شرعًا.
وتابع: الإعلامي لا عنده لحية ولا بيلبس جلابية قصيرة، ولا معاه كارنيه الإخوان، وده معناه إن الشعب المصري العادي جدًا، واللي بتقابل أفراده كل يوم في الشارع والشغل والأتوبيس والسوبر ماركت، كله مصاب بفيروس السلفية والدروشة.
وواصل: فكرتونا بطالبان اللي فجرت تمثال بوذا، والسلفي اللي كان عايز يهد أبو الهول، وحزب النور اللي حجب التماثيل في الإسكندرية.
واختتم خالد منتصر: تجديد فكر إيه اللي هيتعمل وسط السيرك السلفي اللي إحنا فيه ده، ماراثون التنوير لسه طويل قوي، والأجساد عايشه في عصر الإنترنت، والعقول لسه عايشه بتخطط لمعركة الجمل وصفين.
وكان مجلس إدارة النادي الأهلي برئاسة محمود الخطيب، أقام حفلًا لتأبين العامري فاروق نائب رئيس النادي، يوم الأربعاء الماضي، حيث أزاح الستار عن تمثال الوزير الراحل والذي تم وضعه داخل مقر النادي في الجزيرة.
