معرفتش أصرف على عيالي لمدة 6 شهور.. اعترافات المتهم بقتل جواهرجي بولاق أبو العلا|تحقيقات
كشفت التحقيقات في واقعة مقتل حسني الخناجري، جواهرجي بولاق أبو العلا بمحافظة القاهرة، أن أحد المتهمين الخمسة الذين تم ضبطهم، شخص عاطل، يقيم في منطقة بولاق الدكرور بمحافظة الجيزة، وأنه من نفذ جريمة القتل، وسرق مشغولات ذهبية تمثلت في 5 غوايش، و6 سبائك ذهبية، و7 جنيهات ذهب، و4 خواتم، و4 سلسة، و3 انسيالات، ومبلغ مالي.
اعترافات المتهم بإنهاء حياة جوهرجي بولاق أبو العلا لسرقته
ويواصل القاهرة 24، نشر اعترافات المتهمين بارتكاب واقعة إنهاء حياة جوهرجي بولاق أبو العلا، إذ تحدث المتهم الرئيسي، عن ظروف نشأته الاجتماعية، قائلًا: أنا مواليد 1980 بولاق أبو العلا، وأبويا كان صاحب الشركة المصرية الإيطالية للمصاعد وخطبت ثلاثة مرات والخطوبة مكملتش، واتجوزت 4 مرات، وأنا من عائلة مرتاحة ماديًا، وكنت بشتغل مع أبويا، وأمي توفت سنة 1990تقريبًا ووالدي توفي في 2021، وأنا عندي 9 أخوات في منهم ولدين وبنت من أم تانية وفيه منهم اخت شقيقة ماتت موتة ربنا، واتجوزت شيماء بنت عمي وقعدت معاها سنتين في شقة مشعل بالهرم، وكنت بحبها.
واستكمل: بس سيبنا بعض عشان أمها كانت متحكمة وشخصيتها قوية حتي علي أبوها، وبتتدخل في بيتي، وبعد كدة قعدت معاها 6 سنين في قضايا تبديد ونفقة، وبعد كدة رفعت عليا قضية خلع وكسبتها وانفصلنا رسمي في سنة 2004، عشان خلعتني، وفي نفس السنة اتعرفت على واحدة عراقية اسمها نور، عرفتها في ديسكو في شارع الهرم، واتعرفت عليها وقعدت معاها في خدتها في شقة فيصل العمومي، وبعدها بشهر في نفس السنة اتجوزت واحدة لبنانية، وقعدت معاها سنتين ونص، وطلقتها في 2007، وكنت قاعد معاها في نفس الشقة، وبعد كدة أتعرفت علي مي أم ولادي سنة 2009.
وأردف المتهم: أنا دخلت مدرسة القومية المشتركة اللي في الزمالك، وفي رابعة ابتدائي نقلت مدرسة طيبة في بولاق الدكرور في الجيزة، ومعايا إعدادية وخدتها من مدرسة الناصرية في الدقي، يعني الـ3 مدارس دول اللي درست فيهم، واهتميت بالشغل أكثر، وأنا شغال فني مصاعد كهربائية وشريك حسن.ص في مكتب المحاسبة بتاعه في الحتة اللي تخص المصاعد، يعني لما بيجيلي شغل هو بيمسك الحسابات وأنا الفنيات.
المتهم: كانت ظروفي كويسة والحال اتبدل
وبسؤال المتهم عن ظروفه المادية، قال: قبل طلاقي من مي كانت ظروفي كويسة جدًا، أنا فاكر كويس إن وأنا عندي 17 سنة كان معايا عربية فيات 31 وبعدها بسنتين جبت هيونداي اكسيل، وبعدها بسنتين جبت دايهاتسون تريوس، وبعدها بعشر سنين جبت كيا كارينز من غير ما أبيع الدايهاتسون تريوس، وكان معايا فيزبتين وموتوسيكل ريس وآخر عربية كانت هي الكيا الكارينز، وبعت كل حاجة، وآخر حاجة بعتها هي الكيا الكارينز سنة 2021، وكان عندي شقة اللي هي في فيصل العمومي وبعتها سنة 2006 أو 2007، وفيه ورث أبويا، وأنا فاكر أنا كنت بكسب كويس وكان معايا فلوس كتير، وكنت بوصل إني بيكون معايا 2 مليون أو 3 وممكن 4 كمان بس بعد طلاقي من مي.
وأكمل: كمان بعد وفاة أبويا في 2021 ظروف البلد ابتدت تخنق عليا، والأزمة الاقتصادية اللي بتمر بيها البلد أثرت عليا وخليتني مش عارف أعمل حاجة عشان أنا كان أكثر شغلي في المصانع اللي بتتعمل في العشوائيات، واتأثرنا بالغلاء والظروف الصعبة، ومبقتش قادر أجيب حاجة لعيالي وبقالي 6 شهور مكلمتهمش ولا أديتهم فلوس، والسنة اللي فاتت قعدتهم من المدرسة، والسنة دي ما قدمتش.
