اعترافات المتهم بإنهاء حياة جواهرجي بولاق أبو العلا: طلعت من بيتي قُلت هنفذ النهارده وأخذت السكينة والشنطة
كشفت التحقيقات في واقعة مقتل حسني الخناجري، جواهرجي بولاق أبو العلا بمحافظة القاهرة، أن أحد المتهمين الخمسة الذين تم ضبطهم، شخص عاطل، يقيم في منطقة بولاق الدكرور بمحافظة الجيزة، وأنه من نفذ جريمة القتل، وسرق مشغولات ذهبية تمثلت في 5 غوايش، و6 سبائك ذهبية، و7 جنيهات ذهب، و4 خواتم، و4 سلسة، و3 انسيالات، ومبلغ مالي.
اعترافات المتهم بإنهاء حياة جواهرجي بولاق أبو العلا لسرقته
ويواصل القاهرة 24، نشر اعترافات المتهمين بارتكاب واقعة إنهاء حياة جوهرجي بولاق أبو العلا، إذ تحدث المتهم الرئيسي، ردًا على سؤال: ألم يتبادر في ذهنك أن المجني عليه الذي بات هدفًا لك لا يستحق ما سوف يتعرض له، قائلا: لا مانا مش هخشله برضو أطبطب عليه أنا عايز أسرق وده هدفي الأساسي فأي حاجة هتقف قدامي مش هسمح لها وزي ما قلت لحضرتك أنا خلاص الدنيا قفلت في وشي فكنت خلاص على آخري وناوي إني أعمل أي حاجة عشان أجيب فلوس، وأنا رُحت المحل يوم 26 فبراير حوالي الساعة 1:30 مساءً، وأنا كنت لابس بلوفر أسود وفوقيه بليزر بدلة كحلي غامق وبنطلون كحلي وجزمة كوتشي أسود ونضارة شمس سوداء، ووقتها الحانوت كان مفتوحا والراجل صاحب المحل قاعد جوة لوحده.
وأضاف قاتل جواهرجي بولاق أبو العلا: أنا أول ما دخلت قلت له مساء الخير لأني خدت بالي من الصور اللي موجودة في المحل إن هو مسيحي قالي مساء النور، قلت له أنا معايا وديعه كاسرها بمبلغ 350 ألف جنيه قالي كويس إنك بتفكر كده الدهب كل شوية عمال يزيد وهو دلوقتي رخيص وهيزيد وأنا قلت له خلاص إنت هتقفل إمتى قالي علي الساعة 7:00 أو 7:30 مساءً قلت له خلاص أنا هجيلك قبل ما تقفل ومارضيتش أقوله أنا هجيلك الساعة كام، عشان ما يعملش حسابه ويجيب حد يقعد معاه، وبعدين قلت له خلاص أنا همشي وأجيلك تاني وفعلًا مشيت وماقولتلوش أي حاجة.
وتابع: بعد ما خرجت من عنده طلعت على بيتي اللي في المعتمدية الدور الأول فوق الأرضي 5 شارع أبو العلا على عيد المتفرع من العزبة الشرقية، المعتمدية، ووقتها قلت أنا خلاص هنفذ النهارده وده صيدة سهلة بالنسبة لي، وجهزت كل حاجة أصلًا كان معمول حسابها، ورحت واخد السكينة وخدت الشنطة، ووقتها السلاح كان جوة الشنطة والشنطة كانت في الدولاب بغرفة نومي، وهو عبارة عن سلاح سكين متوسط الحجم ذو مقبض أبيض اللون ونصله حاد رفيع وشنطة كروس رصاصي اللون، وبعدين قبل ما أنزل لبست بلوفر أسود اللون وفوقيه الجاكيت الأسود اللون وعليه زونت بيتفك وبيتركب وجزمة كاوتش سودا وبنطالون جينز أزرق ونضارة شمس سوداء، وكان وقتها حوالي الساعة 2:30 مساءً.
وأشار المتهم بقتل حسني الخناجري: أنا وصلت حوالي الساعة 4:30 مساءً المحل، ووقتها صاحب المحل كان موجود والعامل العيل الصغير ده وأنا الصراحة اتفاجئت بالعامل ده بس قولت أنا كده كده هزحلقه وأطلعه برة بأي حجة، وأول حاجة عملتها لما دخلت قلت له إزيك أنا اللي جيتلك الصبح وفكرته بنفسي فقالي اتفضل اقعد ارتاح وفعلًا قعدت وابتديت أطلب منه طلبات كثيرة عشان أتوهه، وقلت له أنا عايز غوايش مقاس كبير، وبالفعل استجاب لكلامي وطلب من العامل اللي عنده أنه يجيب غوايش مقاس كبير وفعلًا جاب غوايش من الفاترينا، لكن أنا مش فاكر مواصفات الحاجات اللي أحضرها العامل.
