منهم لبلبة وأنوشكا.. نجوم الفن يهنئون الزعيم عادل إمام بعيد ميلاده الـ 84 عبر القاهرة 24
حرص عدد من نجوم الفن على تهنئة الزعيم عادل إمام بعيد ميلاده الـ 84، الذي يوافق اليوم الجمعة 17 مايو، متمنين له مزيد من السعادة في حياته المقبلة.
وبرسائل مليئة بالحب والود والأمل وكل الأمنيات السعيدة قرر عدد كبير من نجوم الفن معايدة الزعيم عادل إمام بعيد ميلاده الـ 84 عبر موقع القاهرة 24، ومن أبرز النجوم الفنانة لبلبة والفنانة أنوشكا، والفنانة عايدة فهمي، والفنان تامر هجرس وآخرون.
عيد ميلاد عادل إمام
هنأت الفنانة لبلبة الزعيم عادل إمام بعيد ميلاده الـ 84، قائلة: كل سنة وأنت طيب، ودايما مبسوط وبتضحك زي ما أنت أسعدت الملايين اللي بيعشقوا فنك، أجمل أيام حياتي لما كنا بنشتغل مع بعض وأجمل أفلامي كانت وأنا معاك اشتغلت معاك أجمل أدواري، ومش ممكن أنسى الأيام الحلوة والكواليس الجميلة المنظمة زي ما أنت دايما منظم.
وأضافت لبلبلة: كنا بنفكر مع بعض ونأكل مع بعض، قد إيه بتعشق فنك، وبتحب جمهورك وبتحس بسعادة وأنت بتديهم سعادة وبتضحكهم، أنت أهم إنسان في حياتي، ومقدرش أتصور حياتي من غيرك، يارب يخليك لينا يا عدولة يا زعيمنا يا حبيبنا، ويخليك للملايين اللي بيعشقوا فنك.
نجوم الفنان يهنئون عادل إمام بعيد ميلاده
ومن جانبه، قال الفنان المعتزل نعيم عيسي: كل سنة وأنت طيب يا فنان يا كبير يا عظيم، يا زعيم الفن والكوميديا، ودايمًا بفتكر أيامنا الجميلة أيام شغلنا مع بعض في مسرحية الواد السيد الشغال، ومسرحية شاهد مشفش حاجة، والأفلام اللي عملانها مع بعض كانت سنين جميلة، عقبال 100 سنة.
كما هنأ الفنان تامر هجرس الفنان عادل إمام، قائلًا: كل سنة وأنت طيب يا أستاذ عادل إمام يا حبيبنا، مفيش زيك، أنت هرم في السينما المصرية وبتمنى لك كل السعادة في كل يوم في حياتك، وحشتنا.
بينما قال الفنان محمد علي رزق: كل سنة وأنت طيب ربنا يخليك لينا، اعتزالك على قد ما هو مريحك، ولكن مزعلنا، بس إحنا هنفضل نعيش بأعمالك لأنها هتفضل عايشة العمر كله.
أحمد التهامي لـ عادل إمام: تبناني فنيًا وقدمني
كما أعرب الفنان أحمد التهامي بسعادته لتعاونه مع الفنان عادل إمام في مسلسل فرقة ناجي عطا لله، قائلًا: النهاردة عيد ميلاد قيمة وقامة كبيرة، على المستوى الفني وعلى المستوى الإنساني، هو الأستاذ عادل إمام، عايز أقول حاجة الواحد لما بيجيله دور بيكون فرحان بيه ولو الدور ده مع نجم هو بيحبه بيكون فرحان بالدور أوي، إنما الشغل مع الأستاذ عادل إمام بيكون في قمة السعادة، وإحساس مختلف إنك تقف قدام عادل إمام.
وواصل أحد التهامي: أنا عايز أشكر الفنان عادل إمام، أنه تبناني فنيًا وقدمني لحضراتكم، بقوله كل سنة وحضرتك طيب ربنا يخليك لينا ويبارك في صحتك كل سنة وأنت طيب يا بوب.
وبدورها، هنأت الفنانة عايدة فهمي الفنان عادل إمام بعيد ميلاده قائلة: كل سنة وحضرتك طيب يا زعيم، أنت شرف لينا وشرف للمسرح المصري والدراما المصرية والسينما، حضرتك وحشتنا ومفتقدينك، والوطن العربي منتظر حضرتك يارب ترجعلنا بألف مليون سلامة.
