اعترافات المتهم بقتل جواهرجي بولاق أبو العلا لسرقته: قلت لـ مراتي خلي بالك بنتك لابسة دهب فسألتني منين؟
كشفت التحقيقات في واقعة مقتل حسني الخناجري، جواهرجي بولاق أبو العلا بمحافظة القاهرة، عن أن أحد المتهمين الخمسة الذين تم ضبطهم، شخص عاطل، يقيم في منطقة بولاق الدكرور بمحافظة الجيزة، وأنه من نفذ جريمة القتل، وسرق مشغولات ذهبية تمثلت في 5 غوايش، و6 سبائك ذهبية، و7 جنيهات ذهب، و4 خواتم، و4 سلسة، و3 إنسيالات، ومبلغ مالي.
اعترافات المتهم بإنهاء حياة جوهرجي بولاق أبو العلا لسرقته
ويواصل القاهرة 24، نشر اعترافات المتهمين بارتكاب واقعة إنهاء حياة جوهرجي بولاق أبو العلا، إذ تحدث المتهم الرئيسي بسؤاله من تواصل معك عقب ذلك، أجاب قائلًا:" مي طليقتي أم سلمى كلمتني علي تليفوني من تليفونها، وقالتلي سلمى فين قولتلها لسة معايا تعالي عدي عليا في منطقة وسط البلد، وبالفعل هي قالتلي ماشي أنا هجيبلك، وتقابلنا في حدود الساعة 4:30 مساءً تقريبًا عند محل العبد اللي في وسط البلد، وأول ما مي جت إديت سلمى 200 وقولتلها خدي اركبي بيهم عشان تروحي أنتى وأمك عشان أنا ما بحبش أدي مي فلوس وقولت لـ مي خلي بالك بنتك لابسة حاجات دهب.
وأضاف قاتل حسني الخناجري: سألتني مي عن مصدر المشغولات الذهبية، وقالتلي إنت جبت الحاجات دي منين، قولتلها جاتلي شغلانة جبت منها فلوس وقولت أجيب شوية دهب عشان الدهب رخيص الأيام دي، وبعد كده أنا طلعت المكتب بتاع حسن، ونمت حوالي نص ساعة، ولما عرفت أن أفراد الشرطة بيبحثوا عني أنا على طول روحت واخد الشنطة اللي فيها مسروقات الدهب وروحت مطلع المسروقات من الشنطة بالأكياس القطيفة بتاعتها وحطيتهم في كيسين سود جوا بعض ولفيتهم كويس وحطيتهم جوة الجاكت اللي أنا لابسه وخدت كوفر البدلة اللي فيه البنطلون اللي عليه دم والبدلتين والجزمتين وبنطلونين جينز، وبعدين سبت الشنطة في مكتب حسن صبري وكانت فاضية.
وأردف المتهم بقتل حسني الخناجري: وروحت طالع على طول علي بيتي في 5 شارع أبو العلا على عيد المتفرع من العزبة الشرقية المعتمدية كرداسة وأول ما وصلت البيت هناك قعدت أفكر أنام ولا مانمش كنت خايف ييجوا يقبضوا عليا، بس أنا نمت والكلام ده كان حوالي الساعة 10 مساءً وروحت نايم وعلي حوالي الساعة 4 صباحًا الموافق الأربعاء لقيت مرة واحدة المباحث بيصحوني من النوم وراحوا قالولي تعالى، وكان موجود في البيت وقتها أختي فادية، وقتها أنا كان معايا كوفر البدلة وفيه كيسين سود ملفوفين فيهم الدهب وفيه بدلتين وجزمتين وبنطلونين وكان معايا إزازة خمرة جباز كنت شاريها بفلوس الدبلة والخاتم وكان معايا سنتي حشيش.
