حسين لبيب: لما جيت أقعد على الكرسي بتاعي في نهائي الكونفيدرالية لقيت عليه واحد تاني
عبّر حسين لبيب، رئيس مجلس إدارة نادي الزمالك، عن سعادته بالفوز بلقب كأس الكونفيدرالية الإفريقية على حساب فريق نهضة بركان المغربي، بالفوز بهدف دون رد.
تصريحات حسين لبيب
وقال حسين لبيب في تصريحات تليفزيونية: هناك تحقيق داخلي مع كل الأطراف حول ما حدث في التنظيم عقب المباراة ولكن دلوقتي خلينا نفرح.
وأضاف: حظي وحش لأن برضه سوء التنظيم حصل في الدوري ساعة ما كسبنا، ودلوقتي الكونفدرالية وهقدر أدافع عن الزمالك ولكن اليوم خلينا نفرح.
وتابع: كاف من كان لديه تنظيم المباراة، ولما جيت أقعد على الكرسي بتاعي في الشوط التاني ملقتش الكرسي، ولقيت حد تاني قاعد عليه فـ نطيت على كرسي تاني وقعدت مع مجلس الإدارة، ولكن المكان نفسه دا مكان رئيس الزمالك لكن مكنتش عاوز أعمل مشكلة، ومبهتمش إني أعمل مشكلة من اللا شيء، لكن أنا رئيس الزمالك وهعرف أجيب حقي وحق فريقي لكن مش في الإعلام.
وأوضح: كنت متوقع الفوز بالكونفدرالية بدليل العقد المتاح في بند زياد كمال، وهدف الإدارة من أول يوم كان الفوز بالكونفدرالية، وهناك بند بالفعل في عقد زياد يحق لإنبي الحصول على 100 مليون.
وأردف حسين لبيب: فرحة لا توصف وأنا واحد من الجمهور ولا أتعامل كرئيس نادي وأتعامل على طبيعتي وشايف جمهور الزمالك أوفى جمهور في العالم، ويأتي بأعداد مهولة في حين إن كان مفيش ألقاب.
وأضاف: الزمالك بقاله 16 سنة مشافش بطولة، ومع ذلك تيجي تسأل المشجع يقولك أنا زمالكاوي عشان هو مقتنع إن الزمالك أحسن حاجة، وهو دا الجمهور اللي كسبّنا البطولة ورقم 1.
واختتم حسين لبيب تصريحاته، قائلًا: من أول دقيقة لآخر دقيقة المباراة كانت صعبة، وفي الرياضة مفيش غير إن الواحد لازم يبقا مركّز سواء كان كلاعب أو بيتفرج، لكن التوقعات كلها كانت في صالح الزمالك ومباريات النهائي مبيبقاش فيها فنيات، وكنت عاوز تخطف جون وتنام عليه، والحمدلله ربنا كرمنا ببطولة غالية بعد طول عناء.
