هلا رشدي: أنا مش بستحرم الموسيقى.. وإن شاء الله ميكونش عليا ذنب
ردت المطربة هلا رشدي، على سؤال متابعيها حول إمكانية عدم وضعها للموسيقى في الفيديوهات الخاصة بها بسبب حرمانيتها.
وقالت هلا رشدي، عبر خاصية ستوري على حسابها الشخصي بموقع إنستجرام: أنا مش عايزة حد ياخد برأيي ولكن أنا مش بستحرم الموسيقى خالص، المزيكا حلوة من غير كلام، والكلام الحلو بيحفز الواحد وممكن نسمع أغنية عن سيدنا النبي صلى الله عليه وسلم، بنحس إننا طايرين وعايزين نروح الحرم، وأنا مش بستحرم الموسيقى بصراحة وإن شاء الله ميكونش عليا ذنب.
هلا رشدي: انتقدوني لما غنيت لـ الرسول بالحجاب
وفي وقت سابق، تحدثت المطربة هلا رشدي، عن كيفية تعاملها مع التعليقات السلبية، إذ قالت في لقاء لها مع القاهرة 24: الجمهور طوال الوقت بينتقد سواء كان بالإيجابي أو السلبي، وطالما مأذتش حد أو عملت حاجة غلط خلاص.
وواصلت هلا رشدي: لما غنيت محمد يا رسول الله، الجمهور انتقدوني إني محجبة وبغني، أنتِ في كل الأحوال مهما عملتي في المؤيد والمعارض، وعمري ما فكرت اعتزال السوشيال ميديا لأني مش بحب أخاف، ولكن ممكن فترات أغيب وأرجع تاني، ومش بشوف كل التعليقات، لأن لو قرأت كل التعليقات ممكن تجيبك الأرض، والكلمة تجرحك وتوجعك، وتفضل تفكر فيها طول الليل، وعشان كدة سلامي النفسي أهم.
آخر أعمال هلا رشدي
ومن ناحية أخرى، تعتبر أغنية الخير والبركة، آخر أعمال الفنانة هلا رشدي، والتي تعاونت فيها مع الفنان محمد الحلو، والأغنية من كلمات أيمن بهجت قمر، وألحان محمد يحيى، وتوزيع وسام عبد المنعم.
