أروى جودة: مخفتش إن محمد سامي ينجم مي عمر عليا بنعمة الأفوكاتو.. وربنا يرزق كل واحدة بزوج زيه
كشفت الفنانة أروى جودة سبب تحمسها للمشاركة في مسلسل نعمة الأفوكاتو الذي عرض في الموسم الرمضاني الماضي، والذي جسدت فيه دور سارة، من بطولة الفنانة مي عمر، وللمخرج محمد سامي.
أروى جودة تتحدث عن مشاركتها في نعمة الأفوكاتو
وقالت أروى جودة في لقائها مع القاهرة 24: لما قرأت المسلسل كان عجبني القصة كلها على بعض، وكل ما كنت بقرأ صفحة بكون عاوزة اعرف اللي هيحصل في الصفحة اللي بعدها، وكل لما أوصل لنهاية الحلقة بكون عاوزة أعرف اللي هيحصل، وأول حاجة جت في دماغي إن الناس هيعجبها المسلسل.
وأشارت أروى جودة إلى أن دورها في مسلسل نعمة الأفوكاتو جريء عما قدمته من قبل، قائلة: دوري في نعمة الأفوكاتو أكيد جريء عن الأدوار اللي بعملها ولكن لو معملتش الحاجة اللي تخوفني كممثلة هفضل محصورة في حاجة واحدة، وأنا من أول ما بدأت بحاول أختار أدوار مختلفة عن بعض، وعملت مدمنة في زي النهاردة، ورقاصة في أهو ده اللي صار، وسارة في نعمة الأفوكاتو، وكل فترة بحاول ماحصرش نفسي في حاجة معينة وممتع أنك تجرب حاجات جديدة وتكسر القالب اللي إنت مرتاح فيه.
أروى جودة: مخفتش إن محمد سامي ينجم مي عمر عليا بنعمة الأفوكاتو
وبسؤالها: هل تخوفت من شائعات مجاملة محمد سامي لمي عمر في المسلسل، قالت: محمد سامي ومها سليم أول مكالمة بينا قالوا لي ده مسلسل مي عمر، هل تقبلي؟، وأنا مقدرش أوافق على عمل وبعد ما أدخله أزعل وأقول نجم عليا مراته، والله أكبر ما شاء الله ربنا يرزق كل واحدة بزوج يحبها زي ما محمد سامي بيحب مي عمر، وهي كمان ست جميلة وتستاهل الحب والنجاح ده، والله أكبر عليهم.
وأكدت أروى جودة أنها لم تشعر بحساسية تجاه مي عمر، خاصة أنهما من نفس الجيل، قائلة: اللي شجعني لما فكرت، والحاجة اللي سهلت عليا قبول الدور، هو إننا الثلاثي نعمة وسارة وصلاح، التلاتة ما ينفعش تشيلي شخصية منهم، التلاتة بيكملوا بعض، وده خلى مها سليم وسامي قالوا مش مشكلة نكلم أروى لأن دماغها أكبر من إنها تقول محمد سامي هينجم مراته عليا، والمعادلة ما تكملش لو حد فينا نقص.
