حملت سفاحًا.. محاكمة قاتلة ابنها بالوراق اليوم
تنظر الدائرة 11 بمحكمة جنايات جنوب الجيزة، اليوم الاثنين، جلسة محاكمة أم قاتلة ابنها بمنطقة الوراق.
محاكمة قاتلة ابنها بالوراق
وكشفت التحقيقات في قضية المتهمة بقتل ابنها بمنطقة الوراق، تفاصيل جديدة، حيث أدلت باعترافات تفصيلية أمام جهات التحقيق، كاشفة إقامتها علاقة حميمية مع أحد الأشخاص والذي حملت منه طفلًا، ولكي لا يفتضح أمرها تخلصت منه عن طريق وضعه داخل كيس بلاستيك، وإلقاء الجثة داخل أحد صناديق القمامة.
وحصل القاهرة 24 على نص التحقيقات في القضية رقم 3062 إداري إمبابة لسنة 2023، المتهمة فيها سيدة بقتل طفلها بمنطقة الوراق، حيث استمعت جهات التحقيق لأقوال المتهمة وجاءت كالآتي: اللي حصل إن أنا شغالة عاملة كول سنتر في شركة، وبروح الشغل كل يوم بالمواصلات عادي، وفي آخر شهر يوليو سنة 2022 اتعرفت على واحد اسمه ريمون، ومعرفش اسمه إيه بالكامل وأنا في المواصلات عشان أرکب وأروح شغلي وكان عمال بيبصلي، وبعدين بعدها بكام يوم شوفته تاني ولقيته ركب جنبي وفضل يتكلم معايا ويقولي أنا عايز أتعرف عليكي أكتر، وفعلا أنا اتكلمت معاه وحبيته بس برضو أنا معرفتش أي حاجة عن بياناته أو ساكن فين غير اسمه.
وأضافت: وفي أول شهر أغسطس في سنة 2022 شوفته تاني في المواصلات برضو ودي كانت المرة التالتة اللي أشوفه فيها وركب جنبي وراح قايلي انتي فاضية النهاردة قلتله لا أنا رايحة الشغل فراح قالي لا متروحيش الشغل النهاردة وتعالي ننزل تخرج مع بعض نقعد نتكلم، وأنا وافقت وركبنا توك توك مع بعض وطلعنا على شقة في إمبابة وعملنا علاقة.
واستكملت: ده اللي حصل ساعتها وكنت موافقة ومكنتش أعرف إني هحمل منه، وبعد كدة نزلنا وكل واحد روح على بيته، ومن ساعتها أنا مشوفتوش تاني ومعرفش عنه حاجة واتفاجئت بعديها بشهر إن الدورة الشهرية مجتليش واستنيت الشهر اللي بعده برده الدورة مجتليش وساعتها عرفت إني أنا حامل واتأكدت من ده لما عدى فترة ولقيت بطني بتكبر ومكنتش عارفة ساعتها أعمل إيه، وفكرت أسقّط الحمل ده بس خُفت أعمل كده عشان ميجرليش حاجة وقولت أنا مش هقول لحد وأول ما أولد هرمي الطفل في أي خرابة.
