سامي مغاوري: مكنش ينفع أرقص على المسرح.. وبقول للشباب أنجح علشان بلدك
وجه الفنان سامي مغاوري، رسالة لـ شباب الجامعات في ختام فعاليات الدورة الـ 12 لمهرجان إبداع لشباب الجامعات، بجانب حديثه عن بداياته الفنية.
وقال سامي مغاوري، على مسرح مهرجان إبداع لشباب الجامعات: المجال محتاج رغبة وأمل، إنت لما هتنجح هتنجح لنفسك ولأهلك وولادك وعلشان بلدك وتحط تحت بلدك 60 خط.
وعن بداياته الفنية، فقال سامي مغاوري: أنا لما دخلت جامعة عين شمس، أول حاجة عملتها دخلت فريق التمثيل وكانوا بيدوني أدوار صغيرة ودمها تقيل، قولت أنا هحاول وأجتهد وأنجح وأثبت للناس أني ممثل كويس، وبعد كده بقيت رئيس فريق التمثيل في كلية الحقوق، وبعدين بقيت المخرج وبقيت اختار الروايات اللي على مزاجي وأعملها.
واستكمل: روحت المنتخب واشتغلت معاهم وبقيت من المميزين جدًا، وبقيت أمثل وأخرج وأغني معاهم في الكورال، وكنت بحضر مع فرقة الفنون الشعبية ولكن مكنتش أقدر أرقص بدل ما أستاذ محمود حميدة يكسر رجلي مينفعش، واشتغلت كل حاجة لدرجة أني كنت بروح مسرح الطليعة وأشتغل بالليل.
وأضاف سامي مغاوري: مكناش بنشتغل علشان الجوائز، وكان قصدنا نعمل فن يهم الناس اللي حوالينا وكنا بنعمل حاجة اسمها قوافل الخدمة الفنية سنة 1973، كنا بنسافر وبنعمل عروض فنية تحت الأرض للظباط والجنود، وبعد الانتصار طلعنا فوق الأرض وظهرنا للناس كلها.
