مصطفى شوبير: لو أبو جبل جه كان هيقعد ليا دكة
تحدث مصطفى شوبير حارس مرمى فريق الكرة الأول بالنادي الأهلي للمرة الأولى عقب التتويج بلقب دوري أبطال إفريقيا على حساب الترجي، في بعض الأمور الخاصة بالفريق.
تصريحات مصطفى شوبير
وقال شوبير في تصريحات تليفزيونية: الموقف بعد إصابة محمد الشناوي كان صعب كنا في معسكر الإمارات الودي، والمنتخب في كأس أمم إفريقيا، وفجأة لقينا الشناوي خارج مصاب.
وأضاف: كان ضغط كبير لكن كنت مجهز نفسي لأنه وارد يحصل، وأنا على الدكة ببقى جاهز في كل الأوقات، وكرم ربنا وتوفيقه كان معايا الحمد لله.
وأشار مصطفى شوبير خلال تصريحاته: مكنتش محتاج أثبت لحد حاجة وإني رقم واحد لأن كنت كل ما بظهر؛ بظهر بشكل كويس الحمد لله.
وأردف: كولر اتكلم معايا وقالي أنا عاوز أجيب حارس مرمى لأن بطولة إفريقيا كبيرة ومحتاج واحد داعم معاك يسند، لكن هيقعدلك احتياطي وأنت اللي هتلعب ولو لعبت وظهرت بشكل كويس هتكمل.
مصطفى شوبير: لو أبو جبل جه كان هيقعد ليا دكة
وأكد مصطفى شوبير: أهم واحد في الأهلي هو المدير الفني وهو جه بنفسه قالي أنت رقم واحد واللي هييجي هيقعد دكة ليك فـ أنا قفلت السوشيال ميديا، ولو أبو جبل جه كان هييجي رقم 2 وبديل ليا على حسب كلام كولر معايا.
وشدّد أوفا: الهدف كان إن أنا ألعب وأروح منتخب مصر وبحب الحراس كلهم وعلاقتي كويسة بيهم وهما حراس كبار وبتشرف إني بنافسهم، لكن لو لعبت بحسابات كتير مكنتش هبقى كويس، والأخطاء موجودة في الكورة وممكن ييجي فترة مكونش كويس ودي الكورة عموما.
وزاد خلال تصريحاته: بتشرف أني أحمل اسم والدي أحمد شوبير ولو في حاجة الناس بتشوفها فيا فـ دا مجهود والدي ووالدتي.. وأن أنا ابن شوبير دي حاجة بتظلمني ساعات ولو حد قال عليا حاجة بيتقال إنهم بيجاملوني، ولو قال نفس الكلام على شخص تاني مبتسلطش عليه الضوء.
وتطرق للحديث عن كلام أحمد شوبير عنه: ساعات مدح أبويا ليا بيستفز الناس لكنه بيقولي أنا بعتبر الحراس كلهم أنت ولكن دا شغل شوبير اللي هو هرم الإعلام أنا مقدرش أقوله يقول إيه وميقولش إيه، والعاطفة كلها موجودة لأنه في الأول والآخر أبويا.
ولمّح: يوم ماتش مودرن فيوتشر في السوبر المصري لما غلطت هو أول واحد انتقدني وقالي دانا هطلع أروّقك.
واختتم مصطفى شوبير تصريحاته: كلنا بنشوف وبنسمع الانتقادات لكن الفرق هي هتأثر عليك إزاي وفي ناس بتعرف تستحمل وناس لأ، ووالدتي كانت عاوزة تنزلي الملعب يوم نهائي الكأس أمام الزمالك.
